Nomawi humhim tum Sabalenka
US Open khelh dan tur pawh a ni a, champion lai Aryna Sabalenka chuan a match hmasa berah Rebeka Masarova a hmachhawn dawn a, world number 1 hian a title kawl lai humhim ngei a tum.
Belarusian star Sabalenka hian duhthusama ṭhain season a hmang bik lo, atan hna hautak thawh tur a tam ve ṭhin hle. Kumina Grand Slam hnuhnung berah erawh nikum ang bawka hlawhtlin ngei a tum ruh hle thung.
Sabalenka chuan, "Grand Slam a nih tawh hi chuan a boruak a danglam a, ka phur nghal em em mai ṭhin. Tun ṭumah pawh hian keimah ang bawka hlawhtlin duh ten New York khawpui kan pan khawm leh dawn a ni a, hna a hautak hle ang tih ka chiang.
"Hlawhtlinna chang tur chuan pumpelh kawng zawh theih a ni ngai lo, chuvangin theihtawp takmeuh ka chhuah leh dawn a ni," tiin a sawi a, a khingpui tur Masarova chu world number 109-na daih ni mah se fimkhur a ngai tih a sawi bawk.
US Open inbuatsaihna Cincinnati Masters-ah khan semifinal-ah Elena Rybakina a hneh lo, Canadian Open aṭangin a inhnukdawk bawk, duhthusama ṭha chuan a inbuatsaih lo tihna a ni a, a takah erawh thapui a thawh thei leh viauin a rinawm.
Seeded pahnihna Iga Swiatek chuan Emiliana Arango a hmachhawn dawn - Polish star hian Wimbledon nomawi a chawi thei a, chumi hnuah hard court inelna Cincinnati Masters-ah a hlawhtling bawk, kumin US Open-ah pawh hian beisei a nei sang ang.