Atletico-ah Alvarez a hlim lo?

Spanish club lar Atletico Madrid-in tun season La Liga-a an match hmasa berah Espanyol an ngam lo a, 2-1 in an tlawm - hemi hnu lawkah media ṭhenkhat chuan chanchin lawmawm lo an theh darh a, Julian Alvarez chu Atletico-ah a hlim lo niin an sawi.

Alvarez hian season hman zawh takah khan Atletico tan inelna hrang hrangah match 57 khelin goal 29 ngawt a khung a, assist vawi riat a nei bawk - mahse, minute 90 a khel tluan lo fo a, hei vang hian coach Diego Simeone-a hnuaiah a pawimawh tawk lo nia inhriatna a nei.

Argentine journalist lar Matías Palacios chuan, "Alvarez-a lam hnaite chuan Simeone-a hnuaiah an player hi a pawimawh tawk lo niin an ngai a, a changin a khelh vak lohna left wing-ah dah a ni a, match pawimawh ṭhenkhatah bench-ah a awm bawk.

"Goal 20 chuang a khung a, mahse, world class player angin enkawl a ni lo," a ti a, "Alvarez-a lam hnaite chuan, 'Simeone-a team kan lo zawm hi kan tifuh lo a ni,' an ti hial tawh," tiin a sawi.

Alvarez hian Espanyol nena an inkhelah khan freekick aṭangin mawi zetin goal a khung a, mahse, kha inkhelah pawh khan hun tawp nan minute riat chiah a awm tawh tihah lakchhuah a ni.

Hetihlai hian Atletico-a Diego Simeone-a dinhmun pawh a derthawng niin media ṭhenkhat chuan an sawi. Khawvela coach hlawh hnem ber ni mek hi Atletico hian transfer bazar-ah pawh sum hman tur an pe ṭha tawk ṭhin a, mahse, 2020-21 season-a La Liga nomawi an chawi hnuah an la champion leh lo.

Tun season-ah pawh chak loin bul an ṭan a, nomawi chawi loa season an hmang liam leh a nih ngat chuan Simeone-a dinhmun hi derthawng viau tawh tura sawi a ni - zanin dar 11:00 hian an league match hnihna khel turin Elche an mikhual ang.