Forest-in Douglas Luiz la lut

Europa League khel tur Nottingham Forest pawh an inthuam ṭha ve zel a, Juventus midfielder Douglas Luiz chu season khat chhung loan-a khel turin an la lut a, season tawp ruala a ngheta lakluh theihna dan an ziak tel bawk.

Kum 27 mi midfielder hi Premier League-ah a mikhual lo a, Aston Villa tan hming a lo chher tawh. Season hmasa ṭan dawn khan Juve hi pound maktaduai 42.35-in a zawm a, kum nga chhung atan contract a ziak.

Mahse, Italian club-ah beisei a phak lo a, season hman zawh takah khan inelna hrang hrangah match 27 a khel tling ve hram a, heng zinga match 21-ah hian bench aṭanga luhtir a ni.

Luiz chuan, "He club hmachhawpte ka hmuh hian Premier League-a lo kir hi ka duh a, he club tan leh fan te tana theihtawp chhuah hlan ka nghakhlel tawh hle a ni," a ti.

Brazilian midfielder hian Villa tana a khelh lai khan inelna hrang hrangah match 204 a khel hman a, goal 22 khungin, assist 24 a nei - Juve tan goal khung emaw assist emaw a nei miah lo!

Luiz hian an ram club Vasco da Gama aṭanga a professional zinkawng zawh ṭanin, July 2017 khan Manchester City a zawm a, mahse, Spanish club Girona-ah season hnih loan-a khelin, City tan a inlan hman miah lo - kum 2019 khan Villa a zawm.

Villa tana a season hnuhnung berah hian match 53 khela goal 10 khungin, assist vawi 10 a nei a, mahse, profit and sustainability rules (PSR) hnuaiah Villa an talbuai avangin Juve lamah man to takin an hralh a, tunah chuan EPL-ah bawk a kir leh dawn ta.

Season hmasaa beisei phak baka che ṭha Forest hi rei tak chu transfer-ah an thawm a reh a, kar hmasa khan manager Nuno Espirito Santo chu ṭawng chhuakin, player an lei tam tawk loh thu a sawi.

Santo thusawiin awmzia a nei a, Forest an che vat - tun nipuiah player pasarih an la lut ta a, £140mtd ngawt an seng ta der; loan-a Luiz lakluh theih pawh transfer ṭha tia chhal theih a ni.

Forest hian ani bakah player langsar an la lut ta nual a, Ipswich Town aṭangin winger Omari Hutchinson manah £37.5mtd an seng a, City midfielder James McAtee lakchhuah nan £30mtd dawn an seng a, Rennes striker Arnaud Kalimuendo chu £26mtd-in an lei bawk - a khelh ṭhat dan a zirin a man hi an la pek belh ang.