Serie A an khel chhunzawm Thawnthu a la danglam chuang lo

Thlasik chawlh an nei a, thalsik la zo lo mah se Pathianni zan aṭang khan Serie A chu khelh chhunzawm a ni. Italian football inelna sang berah hian thawnthu danglam a la awm chuang lo - club lian leh champion rinkai hoin hnehna an chang.

Cristiano Ronaldo-a'n Juventus tan goal hnih khungin a team chu Udinese mualah 4-1 in hnehna a chanpui. Inter Milan striker Lautaro Martinez chuan hattrick siamin a team a chakpui bakah, striker palian Zlatan Ibrahimovic tel loin AC Milan an chak bawk.

Milan hian an player hlui Filippo Inzaghi kaihhruai Benevento chu player 10 ni chungin 2-0 in an luhchhuah. Franck Kessie-a'n penalty aṭangin goal hmahruai a khung a, chawlhlawk hmain Sandro Tonali hnawhchhuah ni mah se an tlem zawk hnuah Rafael Leao-a'n an goal hnihna a khung.

Allianz Stadium a inkhelah Andrea Pirlo nauten a tir aṭanga a tawp thlengin inkhel an thunun. Ronaldo-a'n Aaron Ramsey siamsak hmangin bul a ṭan a, Portuguese forward hian goal dang a khung belh bakah Federico Chiesa tan a siamsak bawk.

Italian champion hian goal thum an neih hnuah pawh an la duhtawk mai lo, hun tawp hamrik rik hma chiahin Paulo Dybala chuan chak nemnghehna a khung - mikhual tana Marvin Zeegelaar goal khat khungin awmzia a nei phak lo.

Kum 35 mi Ronaldo-a'n tun season Serie A match 11 aṭangin goal 14 a khung leh tawh a, ani aia khung hnem an awm lo - a dawtah hian goal 12 khungtu Romelu Lukaku leh Ibrahimovic (10 goals) te an awm thung.

Juve manager Pirlo chuan, "Kan khelh ṭhat ber ṭum a ni lo, a tir lamah kha chuan kan hlauthawng tih a lang. A rei hnuah erawh inrintawkna kan nei chhunzawm thei kha a lawmawm," a ti. Juve hian Nilaini zanah hmahruaitu Milan an lenchilh dawn.

Inter Milan manager Antonio Conte chuan Crotone 6-2 a an sawp hnuah Serie A nomawi an beisei ngam thu a sawi, season hmasa league lama pahnihna dinhmun luahtu hi Milan nen point khatin an inthlau mek.

Inter tan hian Martinez-a'n goal thum a khung bakah, striker palian Lukaku leh Achraf Hakimi ten goal khat ve ve an khung a, midfielder Luca Marrone chuan anmahni lamah a ti lut bawk a ni.

Conte chuan, "Ka naute kha chak duhin an tuihal, khatiang inkhel kha ka duhzawng tak chu a ni. Tun ṭuma kan khelh ang khan kan khel chhunzawm zel thei a nih chuan nomawi pawh kan beisei ngam tur a ni ang," a ti.

Inter-in league nomawi an chawi hnuhnung ber chu 2010 daih tawh kha a ni. League title an lak hnuhnun ṭum hian Champions League nomawi an chawi bawk a, kuminah nomawi lian pahnih beisei thei tawh lo mah se pakhat tal lak ngei an tum ruh.