Sindhu-i'n training a nei ṭan

Thla hnih chhung United Kingdom lama training a neih hnuah PV Sindhu chu India-ah a lo kir tawh a, tunah hian nipui laia neih tur Tokyo Olympic inbuatsaih nan training a nei chhunzawm leh tawh.

Kum 25 mi Sindhu chuan, "Coach hran, ngaihdan leh tum dan hran nei Rajiv Ouseph kaihhruaina hnuaiah thil tam tak ka zir chhuak. Ani hi Olympic pawh khel tawh a ni a, ka ṭhat dan bera ka khelh chhuah theih dan tur chu a hria.

"A chang chuan boruak hran deuh han tem te hian rah ṭha a chhuah ṭhin. Thu ṭha tak tak min hrilh a, hmasawn ka ngaihna laiah min pui bawk," tiin UK lama a hun hman chu a hlawkpui thu a sawi.

Season hmasa khan All England Championship an khelh zawh hnuah hri leng vangin an buai a, kum tluanin inelna lian pangngai a awm zui thei lo - kuminah erawh tournament tam zawk buatsaih ngei a nih a rinawm.

Sindhu chuan, "January thla chhung hian Thailand-ah inelna kan neih hman a rinawm a, chumi hnuah pawh tournament hmachhawp dang a awm nual," a ti.

World champion ni lai Sindhu hi Olympic khel turin a tling sa a, chutihrualin inelna a hmachhawn loh rei tawh avangin Japan khawpuia a kal hma ngeiin a tam thei ang ber inkhelh a mamawh.