Arsenal lawm nan Gyokeres-a'n goal a khung

Viktor Gyokeres-a'n an lakluh chhan 'Premier League goal a khung' a tihlawhtling ṭan a, goal khung lawm nan a hmai vawi hnih a hup ta - Arsenal striker thar hian club tana a goal hmasa ber leh pahnihna khungin Leeds United chu 5-0 in an sawp.

Inrinni zan khan Emirates Stadium-ah, inkhel ṭan hmain Eberechi Eze chu tlangzarh a ni a, pound makatduai 60 man Eze hian season li daih contract a ziak a, jersey number 10 a ha ang; ball an pet ṭan hma aṭangin mipui an phur nghal hle.

Mikel Arteta nauten inkhel an thunun zui nghal a, goal pawh an khung hnem - corner aṭanga Declan Rice ball pet chu Jurrien Timber chuan lo tauh lutin hma an hruai, chawlhlawk hma chiahin Bukayo Saka-a'n a khung belh bawk.

Saka-a'n goal a khung theih nan hian Martin Zubimendi chuan Leeds lam ball inpek lai a lo chhutchahsak a, ani hian Timber pein, dutch defender hian Saka tan a lir lut a, angle zim angreng tawh tak aṭangin ani hian a hlap lut.

Second half-ah Arsenal an phur zual, striker thar Gyokeres-a'n defender pahnih a paltlang hnuah a khung a, hun tawp hma chiahin penalty a chhuih lut bawk, a goal khung karlakah hian Timber chuan buai nuaih kar aṭangin a khung bawk a ni.

Manchester United an hneh hnuah Leeds an hneh leh a, match hnihah goal chhuah loin goal ruk an khung - Gunners tan bul ṭanna duhawm a ni, hetih lai hian Saka leh Martin Odegaard te chu hliam vanga thlak an ngai, an chawlh chen tur hriat a ni lo.

Arsenal manager Arteta chuan, "Tun season atan kan khelmuala kan match hmasa ber a ni a, inkhel thunun tak chungin hnehna kan chang. Viktor kha a hlauhawm hle, tharum a ngahin a chet vel dan pawh a dik.

"Lawmna tam tak kan neih karah Martin kha a dar a hliam a, Bukayo kha a malpui a hliam bawk. Anni pahnih hma hian Kai Havertz a hliam tawh bawk, eng ang taka na nge an nih chu ka sawi thei rih lo, hliam thei kan nih avangin squad pawh an tichhah," a ti.

Nipui bazar chhungin Arsenal hian player pasarih an la lut tawh a, bazar hun a la zawh loh avangin midang an la melh dawn em, hriat a ni lo. Spanish coach Arteta hian an squad a chhah ṭha tawkah a ngai a, an duhtawk a nih pawhin a mak lo ang.

North London club hian an match lehpekah chuan Premier League Liverpool an lenchilh dawn, an tan fiahna tak tak a inṭan dawn a ni.