Tlai dar 3-ah SYS FC Vs Aizawl FC

GIG Motors MPL12-ah vawiin tlai dar 3:00 hian RG Stadium-ah SYS FC leh Aizawl FC te an inkhel dawn. Champion lai Aizawl FC hian match hmasa berah Mizoram Police 5-0 in an sawp a, Chanmari FC laka tlawm SYS FC tan hmabak a hautak dawn.

Lunglei club SYS hi Chanmari laka chak lo mah se I Day Football aṭangin nasa takin an insiamṭhat tih a lang a, chutihrualin tihsual vanga goal an chhuah hma an tuar. Coach Lalmuankima hote hian Aizawl FC lakah tlarhnung an tihphui ṭhat a pawimawh dawn a, midfielder tawnhriat nei ṭha HP Lalremruata leh Ruata Tlangte te an pawimawh ang.

Aizawl FC erawh Police an hneh danah an lungawi dawn a, SYS lakah an result ṭha hi chhunzawm an duh dawn. An striker pawimawh C. Lalhriatpuia an la chhawr thei dawn lo a, Police laka hattrick siamtu Zomuansanga tan hming chherna remchang a ni thei ang. Coach R. Lalruatfela enkawl Aizawl FC hian winger an nei ṭha a; SYS FC lakah Vincent Lalduhawma, Laltlanzova leh Sawma Tlangte ten an theihna lantir an tum dawn a ni.