Ramsanga & Rempuii an mawi leh ta

Badminton khawvelah Mizo hming a thang zel - BWF Junior Ranking Tournament, Kotak India Junior International Series 2025-ah Mizo shuttler C. Lalramsanga (silver) leh Lalrempuii (bronze) ten medal an hlawh chhuak.

Hyderabad-a neih inelnaah Ramsanga hi men's doubles category-ah Bhavya Chhabra nen ṭang dunin an inlan a, Durtlang rawlthar leh a ṭhianpa hi seeded no. 1 niin, match hmasa ber aṭangin harsatna an tawk lo - S. Rayaprolu leh A. Singh-te ṭang dun chu 21-15, 21-12 in awlsam takin an hneh nghal.

Ramsanga te ṭhian dun hian quarterfinal ah G. Kaviarasu leh V. Surendar-te inkawp chu 21-13, 21-13 in an hneh a, semifinal-ah A. Aneesh leh A. Sreenivas PV-te ṭang dun chu 21-16, 19-21, 21-18 a hneh zuiin final an lut.

Gold lak ngei an inbeisei laiin, Niranjaan GN Nandakumar leh Yudhajith Reddy Padigepati-te lakah 21-17, 14-21, 21-23 in a tlawm zawkah an ṭang a, silver medal an dawng.

Women's doubles category-ah Rempuii'n Zenith Abbigail nen ṭang dunin, inelna an hmachhawn a, unseeded an nih avangin qualifying round aṭangin bul an ṭan a, semifinal an thleng thei!

Mahse, Serchhip tleirawl Rempuii te ṭhian dun hi semifinal-ah an hneh ngei tura ngaih Keerthy Manchala leh Varna Prabu Anand-te lakah 21-15, 21-14 in an tlawm a, bronze medal an la.

He tournament-ah hian Ramsanga leh Rempuii te bakah H. Lalṭhazuala (Men's singles) leh Sainunmawia Sailo (Men's doubles) te an inlan bawk a, round of 16 an paltlang lo thung.

BWF hriatpui ranking tournament-ah Mizo hming a mawi a, tun kar hian BWF ranking tournament hran, level sang zawk, India Junior International Grand Prix 2025 chu Pune-ah khelh chhunzawm a ni dawn a, Mizo shuttler-te an inlan leh ang.

Mizoram Badminton Association (MBA) chuan thuchhuah siamin, Mizo Shuttler-te hlawhtlinna an lawmpui thu an sawi a, an hmabak tournament atan duhsakna an hlan bawk.