Momota-a'n hri leng a kai

Badminton mipa world number 1 Kento Momota chuan coronavirus a kai tih hmuhchhuah a ni. Japan Badminton Association chuan an player hi tun thlaa khelh tur Thailand Open-ah a inlan theih loh tur thu an sawi.

Japan rama badmin-ton thuneitu sang chuan thuchhuah siamin, "Momota chuan Covid-19 a kai tih Pathianni khan hmuhchhuah a ni a, ani bakah hian player dangte pawh Thailand ramah inkhel turin an kal dawn em tih a chiang ta lo," an ti.

Momota hi nikum khan car in a chesual a, hun rei tak chhung a inkhel thei lo. Kumin bul ṭan nan Bangkok khawpuiah thlawh luh tum mah se a beisei angin thil a kaltluang rih ta lo.

Japan media lian NHK tarlan dan chuan player zin chhuak tur 22 pawh endik vek an ni a, an zingah hian kum 26 mi Momota chiah hian hri leng a kai.