MLS nge tho chhuak dawn Saikhamakawn?

GIG Motors MPL12-ah MLS leh Saikhamakawn ten chak loin bul an ṭan a, MPL club thar pahnih hi vawiin chhun dar 12:00 hian RG Stadium-ah an inkhel dawn. Inkhel hi Zonet Rihnim, YouTube channel (member tan) leh Empai-ah te en theih a ni.

Saikhamakawn hi coach Lalsangzuala Hmar enkawl an ni a, I Day Football-ah final lutin thawm an nei ring hle. Mahse, MPL-ah I Day Football-a an hneh Kanan FC an hneh lo a, Sanga hote hi an vanduai ni loin an inkhel a nung tawk lo a, point hmuh phuin an khel lo. Saikhamakawn tana harsatna belhchhah turin goalkeeper RS Lallawmzuala leh defender Joshua Vanlalrinliana te chu insut chawrh (concussion) vangin Kanan an hneh loh ṭumin lakchhuah an ngai ve ve a, MLS nen pawh an inlan thei lo ang.

Chutihrualin MLS hmachhawn turin mual sirah Lalnunzira a rawn let theih a rinawm a, an goal bawh a nat phah thei dawn. Saikhamakawn hian tlarhma chauh ni loin tlarhnung lam pawh an siamṭhat a ṭul. Lawngtlai club MLS lam pawh Saikhamakawn ang thoa insiamṭhat mamawh an ni.

Dinthar laka an chak loh ṭumin first half-ah MLS goalkeeper Rosangliana a chesual a, chutihrualin second half-ah erawh a rawn insiamṭha hle. SYS chhuak Ngurthanmawia a hmuhnawm a, ani Saikhamkawn lam pawhin an ven uuk a ṭul dawn.

Coach Vanlalpeka'n a pa damlohna avangin team a la ho theih a rinawm lo a, Abraham Vanlalmalsawmtluanga Chinzah hoin an khel ang. MLS hian MPL-a tawnhriat nei M. Lalpektluanga, Ricky H. Vanlalhriatsanga leh B. Rosangliana te pawh an nei a, Saikhamakawn lakah point hlawhchhuah ngei an tum ang.