Cindy hoin Naupang League an ṭan

Reliance Foundation Young Champs (RFYC) leh Mizoram Football Association ṭangkawpin an buatsaih RFYC Naupang League Season lina chu Inrinni khan ṭan a ni a, India U17 leh U20 player Cindy Remruatpuii Colney-i'n inelna hi a kick off. Armed Veng nula Cindy hian Womens League-ah East Bengal tan a khel a, I Day Hmeichhe Football-ah Pachhunga University College a champion pui bawk.

Naupang League hi Aizawl bakah Champhai, Kolasib leh Lungleiah te khelh a ni a, Inrinni khan Champhaiah inelna hi ṭan a ni ve bawk. Kolasib leh Lunglei te hian karleh August 30, Inrinni hian inelna hi an ṭan ang.

Aizawla inelna neihah hian team tel zat chu 16-ah tihpun chhoh inelna chu League Stage leh Cup Stage-ah ṭhen a ni tawh bawk. Team khatah hian category pali Under 8, Under 10, Under 12 leh Under 14-ah ṭhen a ni a, inelna a nung nghal hle.