De Bruyne hoin Napoli an chak

Napoli chuan Kevin De Bruyne hoin Serie A season thar an ṭan a, an midfielder ṭha hian freekick chhuih lut nghalin Naples club hi 2-0 in a chakpui a, match hamsa berah point thum an hlawh chhuak nghal.

Inrinni za khan Mapei Stadium-ah Napoli hi an lenglut a, mualneitu Sassuolo an inveng seng lo - minute 17-naah Scott McTominay chuan goal a khung a, second half-ah Manchester City midfielder hlui De Bruyne-a freekick kan hmu bawk.

Champion lai Napoli tan khualmuala hnehna chan a hlu, coach Antonio Conte chuan, "A tir aṭang khan kan nawr dan leh keimahni goal kan ven dan kha a ṭha hle, season hmasa lama kan khelh dan phung ṭha kha kan la chhawm.

"Kevin khan a khel ṭha nghal, chutihrualin amah chauh ni loin team pumpui khan hmasawn ngaihna lai kan la ngah a, zawimuanga siamrem tur a ni ang," a ti a, season hmasa pawh khan insiamrem an mamawh thu sawi reng chungin a champion pui thei tho a ni.

Inkhel dangah AC Milan erawh an chak lo - kai thar Cremonese lakah 2-1 in an tlawm. San Siro-a inkhel ni mah se Milan an talbuai, mikhual Cremonese tan Federico Baschirotto leh Federico Bonazzoli ten goal an khung, a karlaka Strahinja Pavlovic khungin awmzia a nei phak lo.

Milan manager Massimiliano Allegri chuan, "Inkhel kha kan thlir kir chuan kan ti ṭha tawk lo. Goal khung tumin vawi riat ngawt kan pet a, a hlawhtling kha a tam lo hle. Kan bul ṭan dan a fuh tawk lo a, siamrem ngai lai kan siamṭha thuai ang," a ti.

Luka Modric chuan Milan tan Serie A match hmasa ber a khel a, Real Midfielder hlui hian inkhel bul ṭan mah se hun tawp hmain thlak a ni; kum 39 mi a nih tawh avangin season tluana rinrawl tur chi a ni tawh bik lo ang.