Son leh Muller ten goal an khung

Tottenham Hotspur captain hlui Son Heung-min leh Bayern Munich forward hlui Thomas Muller te chuan Major League Soccer-ah goal an khung ve ve a, an zinkawng tharah pawh goal khung an chhunzawm.

South Korean forward Son-a hian Los Angeles FC tan freekick a chhuih lut a, an khingpui FC Dallas nen 1-1 in an inhnehtawk - a club thar tana match vawi thum a khelhnaah goal a khung a ni.

Kum 33 mi Son-a chuan, "MLS-ah goal ka khung ṭan a, LAFC tana tha thawhtu ka ni chho ve ta te hi ka lawm. Goal khung mah ila kan chak zo lo kha a pawi ka ti, hnehna chang ila duhthusam zawk chu a ni.

"Chawlhkar hnih chhung chauh hun ka la hmang a, ngaiawh tur chuan hun ka la mamawh hret. Chutihrualin, ka thlen chin hi a lawmawm," tiin a sawi a, goal tam zawk khung a duh thu a sawi bawk.

Inkhel dangah Muller pawhin penalty a khung, a club Vancouver Whitecaps chu St Louis City lakah 3-2 in a chakpui, a club thar tan hian a vawi khat nan inkhel bul a ṭan a, captain armband a hreng nghal a ni. A match hmasa zawkah chuan bench aṭangin a lo lut tawh bawk a ni.

Bayern Munich tana vanglai hun hmangtu Muller chuan, "Min ṭantute hmaah an lawmna ka siam thei kha ka lawm, bul ṭan dan duhawm a ni," a ti.