Goal sur tirtu Bayern Munich

Bundesliga an khel ṭan a, champion lai Bayern Munich an hrang nghal - Bavarians hian striker ṭha Harry Kane-a hattrick hmang RB Leipzig chu 6-0 in an sawp, an match hmasa berah goal an sur tir nghal tihna a ni.

Allianz Arena-a inkhelah Bayern Munich hi kanwg tinrengah an chungnung zawk, a khat tawkin goal an khung reng. Crystal Palace winger hlui Michael Olise-a goal hnih leh Luis Diaz-a goal khat hmangin chawlhlawk laiin si thum faiin hma an hruai.

Vincent Kompany leh a nau ten an la duhtawk mai lo, second half-ah Kane chuan goal thum a khung - England captain goal hmasa pahnih hi Liverpool forward hlui Diaz siamsak niin, a hnuhnung ber hi Kim Min-Jae siamsak a ni thung.

Season bul ṭanna chauh la ni mah se Bayern Munich inkhela dak nalh nghal hle, mual sirah Olise leh Konrad Laimer te inkawp an hlauh takzet a, Serge Gnabry pawhin khelh a phu tih a takin a lantir, assist vawi hnih neiin Leipzig tan a hnawksak hle.

Colombia international Diaz-a'n inbengbel turin hun a mamawh rei lo bawk a, tlarhma laia awm Kane chu striker ṭha bik a nihzia kan hmu nawn a, a sir aṭanga thlawptu a neih ṭhat avangin goal tam zawk a khung a nih pawhin a mak lo ang.

Kum 32 mi Kane chuan, "Bundesliga season thar kan match hmasa berah goal ruk faiin hnehna kan chang a ni a, kan inkhelah khan sawisel tur a awm lem lo, lungawina tur lam zawk zel a ni.

"Chawkhlawk hmain goal thum kan khung a, half time kan hman lai khan goal khungtu zinga tel ngei turin theihtawp chhuah ka ngai a ni tiin ka infuih a, a tawpah chuan ka hlawhtling - a bul ṭan dan duhthusam a ni," tiin a sawi.