PSG boss-in Cavani pa a chháng!

Paris St-Germain mana­ger Thomas Tuchel chuan an striker Edinson Cavani-a pa Luis-a'n a fapa an zah tawk loa a puhna chu a chhang a, "Cavani zah lohna emaw duhsak loh bikna kan nei lo," a ti. 

PSG hian Nilaini zan khan French League Cup semifinal-ah Reims chu 3-0 in an hneh a, Cavani hi squad-ah pawh a awm lo. Kum 32 mi striker hian tun season-ah a beisei angin hmun a chang lo a, inelna hrang hrangah match 14 chiah khelin goal nga a khung a, tun thlasik transfer-ah Atletico Madrid-in lakluh an duh avangin chhuah a dil - Chelsea nen sawizawm a ni bawk.

Tuchel chuan, "Cavani hian a ṭhalah hliam a neih avangin kan zingah a tel thei lo a, a pawi takzet a ni. Mahse, a hliam rei zawng tur erawh engmah kan hre lo," a ti! Cavani-a pa Luis chuan, "Atletico-a khel turin ka duh a, Diego Simeone-a'n a duh takzet a ni. Mahse, PSG coach hian Champions League atan a mamawh thu a sawi tlat si. Atletico kal turin a chance a ṭha hle a, June-ah pawh a pan mai thei. 

"Vawiinah hian PSG hian an chhuah phal se, Atletico-in lo la duh reng bawk se Spain a pan nghal ang. Ka fapa hian inkhelh tam a mamawh a, mahse PSG hian match khatah minute li emaw minute ruk lekte an khelhtir a, PSG enkawl dan hi a dik lo a ni," a ti. PSG hian Pathianni zan dar 1:30-ah league match khel turin Lille an lenchilh dawn a, Ligue 1-ah match 20 khel tawhin point riatin hma an hruai fal mek.