Olympic kan kaltlangpui ang - Japan PM

Japan prime minister Yoshihide Suga chuan coronavirus karah pawh Tokyo Olympic 2020 chu kumin nipui laia an neih ngei tur thu a sawi chiang.

Infiamna khawmpui lian hi ruahman lawk dan chuan nikuma neih tur kha a ni. Mahse, Covid-19 vangin khawvel a buai a, inelna hi kum khat atan an sawn tlai - a hming erawh Tokyo Olympic 2020 a ni dawn tho.

Olympic hi July 23 aṭanga neih ṭan tur a ni a, ruahman lawk dan chuan August 24-ah an zo ang; a hnu lamah Paralympics neih zui tur a ni bawk. International Olympic Committee chuan a hun hi sawn nawn a rem loh thu an sawi tawh.

Japan hian nasa takin hri leng an do a, hri kai pawh an tlahniam chak hle. Mahse, tun hnai khan Tokyo khawpuiah chuan ni khat chhungin mi 1000 chuangin an kai thar leh tih hriat a ni.

Mahse, Prime Minister Yoshihide Suga chuan, "Kumin nipuiah Olympic kan thleng ang. Him leh thlamuan thlak taka neih a ni ang," tiin a sawi. Inelna neih chu khawvel pum inlungrualna leh ṭanhozia lanna tur a nih thu a sawi bawk.

Japan ramah hian mi 239,041 chuangin coronavirus an kai tawh. Johns Hopkins University tarlan dan chuan hri kai zinga mi 3,337 chuan an nunna an chan phah.

Sorkar thuneitu lamin Olympic neih ngei an tum a, hetihlai hian Japan rama media lian NHK-in mipui ngaihdan a lakah chuan, mi tam zawkin inelna hi a hun sawn hlat emaw neih loh mai emaw an duh zawk.