Beisei neitu Alexander Zverev
US Open chu nizan aṭang khan khelh ṭan a ni a, zaninah seeded pathumna Alexander Zverev chu a inlan ve ang - Zverev hian a vawi khat nan Grand Slam nomawi chawi ve theih tawh ngei a beisei a ni.
Kum 28 mi Zverev hi player ṭha tak a ni a, nomawi pawh a chawi hnem tawh. Mahse, inelna lian taia sawi Grand Slam bikah a la champion lo, hlawhtling teuh viau ṭhin mah se a vanduai zawkah a ṭang leh ṭhin.
ATP Finals leh Olympic champion pawh ni tawh Zverev chuan, "Wimbledon kan khel zo chiah kha chawlh ka la a, ngun takin ka inngaihtuah. Tennis khel loin hun hlimawm dang ka hmang a, rilru engthawl leh zalen takin hun ka hmang.
"A chang chuan kan nundang phung ngai reng ni loa boruak dang kan hip a ngaih chang a awm, grass court season zawh hnua ka hun hman dan pawh khan rilru lamah nasa takin min ti hmasawn chuan ka hria," a ti.
Wimbledon an khelh zawh hnu khan Zverev hi Spain-ah a zin a, Grand Slam vawi 22 champion tawh Rafael Nadal-a academy a tlawh a, coach ṭha Toni Nadal kawmin a hnen aṭangin thu ṭha tam tak a dawng.
German tlangval Zverev chuan, "Tun tournament hi Grand Slam ka khelh hnuhnung ber tur a nih ka ring lo a, ka champion theihna hmasa a nih erawh ka beisei, dawhthei takin ka tana hun ṭha lo chhuah hun ka nghak.
"Ka elpui te hi player ṭha bik tak tak an ni a, vanglai an hmang mek bawk. Major tournament a nih chuan awlsam taka zawh mai theih a ni lo tih ka hriatchian a ngai," a ti, set nga an khelh ṭumin Zverev hi a dawhthei tawk lo ṭhin, a a tuar fo tawh a ni.
US Open-ah hian mipa player ṭha - Novak Djokovic, Jannik Sinner leh Carlos Alcaraz te an inlan vek dawn a, anni ho hi Grand Slam boruak sang ngam tak vek an nih avangin Zverev tan hna a awlsam dawn lo, hlawhtling turin theihna erawh a nei thung.