Barcelona an chak ve leh ta

Spanish La Liga a ngaihnawm zel a, Barcelona-in tlat fal lutuk duh loin hnehna an chang ve leh ta - an mikhualna ramah Huesca chu Frenkie de Jong goal khung hmangin 1-0 in an hneh. 

Barcelona-in hnehna an chan avangin La Liga table-ah pangana an ni ve leh ta a, league match 16 an khelh aṭangin point 28 an nei.

Inrinni zan khan Real Madrid chuan 2-0 in Celta Vigo an hneh bawk a, Lucas Vazquez leh Marco Asensio-ten goal khat ve ve an khung - champion beiseina a la nung zel. 

La Liga hmahruaitu erawh Atletico Madrid an la ni reng a, Pathianni zan khan Alaves chu 2-1 in an hneh. Atletico tan Marcos Llorente leh Barcelona duh loh Luis Suarez-ten goal khat ve ve an khung. 

Tun season tluka Barcelona dinhmun sawi thiam a harsat hi a la tam lo. Hnehna an chana, "Barca an lo kir ta," tia media-ten an sawi hluai hnu lawkah an tlawm leh ṭhin a, sawithiam an harsa. 

Valencia (2-2) a an inhnehtawkpui hnu lawkah Real Valladolid (3-0) an sawp a, fan-te an phur ve leh dawn chauha Eibar chu 1-1 in an inhnehtawkpui zui. 

Pathianni zanah pawh thawnthu dang an rawn ziak ve leh ta a, fan-te hmela nui hmel hnutchhiah turin Huesca chu 1-0 in an hneh - an phur thar ve leh ang.

Mahse, Barca hian hmahruaitu Atletico Madrid chu point 10 laiin an la thlau a, match khatin an khel tam zawk bawk - league match 16-ah vawi riat chiah an la chak a, vawi li draw result neiin vawi li an tlawm bawk. 

Eibar nen an inhnehtawk ṭumin hliam vangin Messi-a inlan thei lo a, Huesca lakah erawh Catalan club tan bul a rawn ṭan - goal khung lo mah se danglamna thlentu a ni. 

Minute 27-na lekah Frenkie de Jong chuan Barca tan goal hmahruai a khung a, Dutch midfielder goal khung hi Messi ke aṭanga chhuak a ni - Messi-a'n Barca tana La Liga match 500-a khelhna a ni a, hetih chhung hian goal 451 khungin assist vawi 200-a nei. 

Nipui transfer-a contract hmang zo tawh tur Messi hian Barca tan inelna hrang hranga match 750-a khelhna chiah a ni bawk a, goal 644 khungin assist vawi 284 a nei bawk. 

Argentine forward hian goal khungna remchang pawh a nei a, mahse, a freekick pet chu ṭha takin an dansak - Huesca goalkeeper Alvaro Fernandez chet ṭhat zan a ni a, Ousmane Dembele leh Pedri-ten hun ṭha an neihah an paltlang thei lo. 

Barcelona coach thar Ronald Koeman-a'n Luis Suarez a duh lo a, Atletico Madrid lamah a kal tir - hetihrual hian Suarez nen engtikahmah huang khata an dah ngai loh tur Martin Braithwaite a ring lawi si!

Koeman-a thutlukna mak hi a âtthlakzia Suarez-a'n a lantir zel a, Alaves lakah Atletico Madrid chu 2-1 a hnehna chanpuiin league hmahruaitu an nih chhunzawm zel.

Atletico hian minute 41-naa Llorente goal hmangin hma an hruai a, Alaves-in minute 63-naah red card vangin defender Victor Laguardia an chan zui - chak tur a chiangah ngaih a ni. 

Mahse, Alaves hian hun tawp nan minute ruk chauh a awm tawh tihah Felipe-a 'own goal' hmangin an chhanglet - a tawpah a changtupa inlan hun a thleng a, substitute Joao Felix-a cross aṭanga ball kal chu Suarez-a'n chak nan a khung a, league match 12-ah goal kua khungin assist vawi hnih a nei tawh!

Inrinni zan La Liga inkhelah Real Madrid chuan 2-0 in Celta Vigo an hneh a, league match 17 an khelh aṭangin point 36 an nei tawh - an chunga awm Atletico chu match hniha khel tamin point hnihin an phak lo.

Real khelmuala inkhelah mualneitu team tan Lucas Vazquez chuan minute rukna lekah goal hmahruai a khung a, Marco Asensio siamsak a ni. 

Minute 53-naah Asensio hun her chhuakin goal a khung ve leh a, chak tur a chiang tawh - kum 24 mi winger tan tun season-a a goal hmasa ber a ni bawk. 

Celta Vigo tan Santi Mina chuan hun ṭha nei ve mah se goal-ah a chantir thei lo a, minute 51-naa La Liga top scorer Iago Aspas lakchhuah ngai chu Celta tan channa a ni - Aspas hian league-ah goal kua a khung tawh a, Villarreal striker Gerard Moreno leh Suarez nen goal kua ṭheuh khungin La Liga-ah anni aia khung hnem an awm rih lo.