Man City-in Lampard-a dinhmun tiderthawng

Manchester City-in Pathianni zan khan Stamford Bridge an luhchhuah a, Chelsea 3-1 in an sawp. Pep Guardiola hote tan Premier League nomawi rim a nam chho leh ṭan a, Frank Lampard-a tan erawh season tawp thlenga Blues enkawltu nih pawh a harsa dawn.

Man City-in Ilkay Gundogan, Phil Foden leh Kevin de Bryune te hmangin first half-ah an khung a, goal tam zawk khung thei tur khawpin an nawr na bawk. Mikhual lakah Blues an zawr a, an vanneih zarah scoreline tih mawi nan Callum Hudson-Odoi hmangin injury time-ah goal khat an khung ve hram.

City an ṭha

Covid-19 vangin Manchester City an buai a, Kyle Walker leh Gabriel Jesus ten coronavirus an vei hnuah hri leng vangin Everton nena an inkhel tur pawh sawn phah a ni hial.

Stamford Bridge-a an lenluh ṭum pawh hian Walker leh Jesus bakah Ederson, Ferran Torres, Eric Garcia leh Tommy Doyle te an chhawr thei lo. Kum hlui thlah zanah Benjamin Mendy-a'n coronavirus dan a bawhchhia a, amaherawhchu French defender hi bench-ah a awm thei tawh thung.

Man City-in ṭan phat aṭangin inkhel an thunun a, tun hnaia beisei pha tawk lo Kevin De Bruyne pawh a ṭhat dan berin la inlar lo mah se a thiamzia hmuh hmaih rual a ni lo.

Belgian midfielder hi Guardiola-a'n 'false nine' atan a hmang a, Chelsea defender tan a hnawksak hle. Gundogan-a'n tawih takin minute 18-naah goal hmahruai a khung a, minute thum hnuah Foden-a'n a theihna sang tak a pholang.

Minute 34-naah counter attack hmangin City-in an nawr let a, Raheem Sterling-a'n a harsa zawng zawng a tih zawh hnuah goal ban a pet per a, hemi per let hi player nazawng tan thun theih tur niin lang lo mah se De Bruyne-a'n awlsam takin a khung.

Manchester City boss Pep Guardiola chuan, "Season hnih thum liam taa kan khelh dan ang kha kan hmu leh ta. Chelsea laka khualmuala kan chak hi a lawmawm a, hun tawpa goal kan chhuah erawh pawi ka ti hle," tiin an khelh ṭhat thu a sawi a, an vanneih ṭum ni se goal thum aia tam an khung ang.

Ban hmabak Frankie?

Nipui transfer-ah Chelsea an tal na ber a, pound maktaduai 200 chuang sum an seng. Blues-in bul ṭan ṭha tawk lo mah se an insiamrem hnuah champion rinkai an ni chho a, December 12 zan khan Everton hneh se Premier League hmahruaitu ni thei tur an ni.

Amaherawhchu Blues hian Toffees an hneh lo a, hemi hnu hian Wolves (2-1), Arsenal (3-1) leh Man City (3-1) te an hneh lo a, Aston Villa (1-1) lakah point khat chauh an hlawhchhuak. Lampard-a hote hian league match hnuhnung paruk aṭangin West Ham (3-0) chiah an hneh a, table-ah pawh pariatnaah an tla thla ta.

Chelsea tan result a chhia tih phat rual a ni lo a, an khelh dan a mangang thlak bawk. Man City-in kawng tin rengin Stamford Bridge-ah inkhel an thunun a, Pep Guardiola hote hi an kim loh bawk avangin Blues tan a mualpho thlak hle. Ha hipa an fak hman defender Thiago Silva leh keeper Edouard Mendy te hming lam zawh rualin sawiselna a ri ṭan ta bawk.

Kum 2003-a Roman Abramovich-a'n Chelsea a lei hnua manager awm tawh zingah Frank Lampard-a record a chhe ber a, English manager hian a duh ang player a lakluh bawk avangin a hna chelh reng turin chet ṭhat a mamawh. 

Chelsea boss Frank Lampard chuan, "Tihsual kan nei a, mimal anga chetsual kan nei a, kan tih ṭhat tawk loh avangin kan khingpuiten min hrem a ni," tiin a khel ṭha lo tih a pawm.