Saka-a'n Liverpool hmachhawn dawn lo

Arsenal player chhuanvawr Bukayo Saka a inhliam leh ta a, kar li tal a chawlh tur thu sawi a nih avangin Liverpool a hmachhawn thei dawn lo - Arsenal hian Pathianni zan dar 9:00-ah Liverpool an lenchilh dawn a, Saka tel thei lo tur hi pawi an tikhawp ang.

Season bul ṭan ṭha tak Gunners hian kar hmasa khan Leeds United chu 5-0 ngawtin an sawp a, mahse, he inkhelah hian Saka hian a malpuiah hliam a tuar a, Liverpool a hmachhawn theih dawn loh phah.

Saka hian September 21-ah Manchester City an hmachhawn hunah chuan khelmual luh theih a inbeisei a, mahse, bul ṭan tur chuan a harsa mai thei - international break-ah England tan a inlan thei dawn lo bawk a, World Cup qualifier-ah Andorra leh Serbia a hmachhawn thei lo ang.

He thu buatsaih a nih lai hian Arsenal captain Martin Odegaard dinhmun pawh sawi chian theih a la ni lo a, Norwegian midfielder pawh hi Leeds nena an inkhelah khan a darah a inhliam.

Odegaard hi first half-ah lakchhuah a ngai hial a, Liverpool nena an inkhel turah a inlan theih dawn leh dawn loh a la chiang lo - Norway playmaker tel loa Anfield lenluh a hautak mai thei.

Hetihrual hian Gunners hi an 'mood' fuh lai tak a ni a, nipuiah tlarhmaa khel turin Viktor Gyokeres, Noni Madueke leh Eberechi Eze te ho an la lut a, Gabriel Martinelli, Leandro Trossard, Ethan Nwaneri leh Max Dowman te ho chu Saka leh Odegaard hmun ruak luah thei an ni bawk.