IWF hruaitu zingah Mizo

Indian Weightlifting Federation (IWF) chuan kum 2025-2029 chhunga an hruaitu tur an thlang a, executive member mi panga zingah Malsawma Khiangte a tel a, ram pum huap weightlifting hruaitu a ni ang.

Bethlehem Veng pa Malsawma Khiangte hi Jeremy Lalrinnunga leh Mizo weightligter tam takin hlawhtlinna an chan theih nana hna thawktu a ni a, Mizoram Weightlifting Association (MWLA) hruaitu niin, tunah chuan huam zau zawkin weightlifting a buaipui dawn a ni.

Malsawma Khiangte chuan, "Pathian min hruaina vang a ni a, ram pum huapa hruaitu ka ni ve thei hi ka lawm. Mizoram lama ka thawhpui zawng zawngte min thlawpna vang a ni a, anni tel lo chuan tun hun hi thlen theih a ni lo.

"Mizo ṭhalai tam takin weightligting huangah theihna an nei a, chung miten hma an sawn theih nan chuan MWLA pawhin theihtawp kan chhuah a, sang zawk thlen tumin theihtawp kan chhuah zel ang.

"Mizoramin Sports Conclave 2024 kan thlen ṭum khan tuna President ni ta Sahdev Yadav hi a lo kal a, kan lo buaipui a ni. Inpawhna ṭha a awm phah a, sorkar chungah pawh ka lawm takzet," tiin Vanglaini a hrilh.

IWF hruaitu thlanna hi Ahmedabad, Gujarat-ah August 24, Pathianni khan neih a ni a, inthlan zawh hian Commonwealth Youth leh Senior hawnna chu Naranpura Sports Complex, Ahmedabad-ah neih nghal tur a ni ang.