SYS tan Aizawl FC an ṭha hret

GIG Motors MPL12-ah Aizawl FC-in nimin tlai khan SYS FC an hmachhawn a, I League club hian 3-0 in hnehna an chang. Coach R. Lalruatfela enkawl AFC hian point ruk hmuin MPL12 hmahruaitu an ni.

RG Stadium-a inkhelah hian Aizawl FC an chungnung zawk a, mah se Lalmuankima kaihhruai SYS FC-in defensive game an khelh vangin I League club-in goal khung an harsat. Aizawl FC coach R-a'n SYS FC goalkeeper leh tlarhnung inkar zau tak a hmu fuh a, an goal nawr dan a thlak.

AFC coach R-a thutlukna siam fuh nghal lo mah se first half injury time-ah an tifuh. Tlarhnung aṭanga Rohmingthanga vawrhluh chu midfielder ball thiam Lalawmpuia Sailo-in um lutin injury time-ah hmahruaina goal a khung.

Second half-ah inkhelh kalhmang a danglam lo a, Aizawl FC bawkin inkhel thununin SYS-in goal venhim hna an thawk. Minute 83-naah Sawma Tlangte-in freekick aṭangin crossbar a pet per a, a per chu OmOma'n a ke vei lama lo pet nghalin goal a khung. Dinthar tlangval OmOma vanneih ni ni se, hattrick siam thei tur a ni a, a ke dinglamin goal ban a pet per bawk.

Aizawl FC-in hun tawp lamah an nawr na a, Sawma Tlangte-in a chakna hmang ṭangkaiin, a inzirchhuahna SYS FC lamah minute 84-naah a pet goal leh bawk. I League club-in nawr chhunzawm mah se goal hmaah an vannei tawk lo a, 3-0 in inkhel a tawp.