Everton tan Grealish a che na

Jack Grealish-a'n ngaiawh leh tumin hma a la a, a inkhelh tam theihna tur zawngin Everton a zawm - English forward hian a club thar tana inkhel bul a ṭanna hmasa berah assist vawi hnih a nei.

Pathianni zan tir lam khan Everton chuan an khelmual thar Hill Dickinson Stadium-ah Brighton & Hove Albion an mikhual a, 2-0 in an hneh. Iliman Ndiaye leh James Garner ten goal an khung, a pahnih hian Grealish siamsak an ni.

Brighton hian goal hnih an chhuah hnuah insiamṭhat theihna remchang an nei. Yankuba Minteh-a shot chu Kiernan Dewsbury-Hall chuan a kutin a lo khawih a, penalty a chawih phah.

Mahse, Danny Welbeck-a penalty pet chu Everton goalkeeper Jordan Pickford chuan a lo dansak a, anmahni khelmualah ngei point thum an hlawh chhuak a, goal an chhuah loh avangin an lawmna a zual bawk ang.

Toffees manager David Moyes chuan, "Khelmual tharah result ṭha tak kan nei a, kan player neih sa bakah hmel thar kan hmu bawk. Premier League hi chu a hautak a, team ṭha dangte elphak nih ve tumin theihtawp kan chhuah dawn a ni," a ti.

Manchester City aṭanga loan hmanga Everton zawmtu Grealish chuan, "Man City-ah kum li chhung hun nuam tak ka hmang a, nomawi pawh tam tak kan chawi hman, tun nipui bazarah erawh boruak dang hip a hun tih ka hria.

"Brighton hi tun hma pawhin ka hmachhawn fo tawh, a awlsam ngai lem lo. Everton ka pan chhan hi tam tak a awm, chung zinga langsar tak chu tun ṭum kan inkhelah khan ka hmu, hnehna chan tumin theihtawp kan chhuah," a ti a, a hlim hle.