Point 62 nei thei Stephen Curry

Stephen Curry-a'n Portland Trailblazers lakah point 62 zet a nei a, basketball inelna sang ber NBA match khata point a neih hnem ber ṭum tawngin Golden State Warriors chu 137-122 in hnehna a chanpui.

Kum 32 mi Curry hi NBA match khata point 60 nei tling thei upat lamah pahnihna a ni, player ropui  fam ta Kobe Bryant khan kum 37  mi ni chungin point 60 chuang a  lo nei tawh.

American guard Curry hian 2013 February thla khan New York Knicks lakah point 54 a lo nei tawh, hun rei tak hnuah a mimal record ṭha tak hi  a rawn khum, tuna a record thar siam hi khum leh tur chuan vanneih tel a ngai tawhin a rinawm.

Warriors head coach Steve Kerr chuan, "Second 30 chauh awm tawha ka lak chhuah chhan kha chu, a hmuna awm mi 42 chauh pawh khan zahna chibai kan pek ka duh vang a ni. Steph-a'n thil ropui tak tak a tih hi chuan amah enkawltu nih ringawt pawh a lawmawm," a ti.

NBA inkhel hi a hmunah fans lamin an en thei lo, coronavirus vangin season hmasa chawhnu lam aṭang khan court chhunga entu nei loin an khel ṭhin a ni.

Golden State hian tukin zing dar 8:30 hian Sacramento Kings an hmachhawn lehnghal ang.