Champion lai Sabalenka a chak

US Open hmeichhe champion lai Aryna Sabalenka chuan a nomawi humhim ngei a tum, nimin zing khan a match hmasa ber khelin Rebeka Masarova chu harsa lutuk loin a hneh.

Flushing Meadows, New York-a inkhelah, seeded pakhatna Sabalenka hian Masarova hi 7-5, 6-1 in a hneh a, a service vawi khat hloh ve mah se a khingpui service hi vawi li ngawt a chhuhsak thei thung a ni.

Grand Slam vawi thum champion tawh Sabalenka chuan, "Ka beisei phak bakin thlawpna ka dawng ṭha, set khatna ka lak hlima thawm rawn ri chhuak phei kha chu pui tak a ni, ka hmul thi a ding sung sung thei, khatianga inkhelh kha chu a nuam," a ti.

Belarus star Sabalenka hian US Open bakah Australian Open nomawi vawi hnih a chawi tawh, a tan chuan hard court hi inelna ṭha tak a ni. A match lehpekah chuan Polina Kudermetova a hmachhawn leh ang.

Inkhel dangah Emma Navarro chuan fiahna a paltlang, season hmasa semifinalist hian Chinese player Wang Yafan chu 7-6 (11-9), 6-3 in a hneh, set khatnaah 5-3 a a hnufual hnuah a pawtthla leh a ni.

Wimbledon champion Marketa Vondrousova chuan Oksana Selekhmeteva 6-3, 7-6 (7-3) in a hneh a, second round-ah chuan tualchhung player McCartney Kessler a hmachhawn leh thung ang.