East Bengal an chak ve ta

Indian Super League-a a vawi khat nan East Bengal an chak ve ta a, Pathianni zan khan Odisha FC chu 3-1 in an hneh.

Kolkata club tan hian Anthony Pilkington leh Jacques Maghoma-te chuan first half-ah goal khat ve ve an khung a, hun tawp nan minute hnih chauh a awm tawh tihah Bright Enobakhare chuan goal khat a khung ve leh bawk.

East Bengal defender Danny Fox chuan hun pek belh minute linaah an lamah a ti lut a, mahse, Odisha tan tho leh turin hun a awm tawh lo.

Kum 22 mi Enobakhare hi January transfer-a East Bengal zawm a ni a, Odisha lakah hian minute 73-naah luhtir niin a match hmasa berah goal a khung nghal. 

Nigeria Under 23 international hian Wolverhampton Wanderers, Scottish Premiership club Kilmarnock, League One club Coventry City, Championship club Wigan Athletic leh Superleague Greece club AEK Athens tan pawh a lo khel tawh. 

Odisha tan Jerry Mawihmingthanga chuan inkhel bul a ṭan a, minute 83-naah Daniel Lalhlimpuia luhtir ni mah se danglamna thlen turin hunin a daih tawh lo.

Pathianni zan inkhel dangah ATK Mohun Bagan chuan 2-0 in NorthEast United an hneh a, Roy Krishna chuan goal hmahruai khungin Highlander striker V.P. Suhair chuan an lamah a ti lut bawk. 

NorthEast United tan Lalengmawia leh Rochharzela ten inkhel bul an ṭan a, an team an chakpui zo lo. 

Inrinni zan inkhelah Mumbai City chuan 2-0 in Kerala Blasters an hneh a, Adam le Fondre chuan minute thumna lekah penalty aṭangin goal hmahruai a khung a, Hugo Boumous chuan goal khat a khung ve bawk. 

Boumous hian goal hnih khungna remchang nei mah se penalty aṭanga a hun ṭha neih chu Aizawl FC goalkeeper hlui Albino Gomes chuan a dansak. 

Blasters vanneih zan a ni lo - inkhel bul ṭantu Mizo midfielder K. Lalṭhathanga (Puitea), Jordan Murray leh Sahal Abdul Samad-ten hun ṭha nei mah se goal-ah an chantir lo vek a, Murray-a goal khung chu offside vangin pawm a ni lo bawk.