Mizoram cricket team zin chhuak

Board of Control for Cricket in India (BCCI) hnuaia Twenty20 cricket inelna Syed Mushtaq Ali Trophy 2021 khel turin Mizoram team an zin chhuak a, inelna neihna tur Chennai an thleng tawh.

Tournament khel tur hi group parukah ṭhen hran an ni. Mizoram hi plate group-ah state dang pasarih nen an awm. January 11 hian an match hmasa ber atan Sri Ramachandra Medical College Ground, Chennai-ah Sikkim an hmachhawn ang.

Group tina awmkhawmte an inkhelh kual hnuah a sang pahnih ten knockout stage an lut dawn. Group A aṭanga E thlengin group tinah team paruk zel an awm. Mizoram awmna plate group-ah erawh ram pariat dah an ni.

Mizoram manager Lalroṭhuama chuan, "Nikum khan Syed Mushtaq Ali Trophy kan khel tawh a, chak kan nei lo. Kuminah erawh inbuatsaihna kan neih ṭhat avangin hnehna kan chan ve ngei pawh ka beisei," tiin Vanglaini a hrilh.

Nikum December thla khan Durtlang khelmualah Mizoram team hian inbuatsaihna an nei a, chumi hnuah Suaka Cricket Ground, Sihhmuiah training an nei chhunzawm leh bawk.