Old Firm derby-ah Rangers chak

Steven Gerrard enkawl Rangers-in hma lam an pan zel a, Inrinni zan khan Old Firm derby-ah an hmelma kumhlun Celtic chu 1-0 in an hneh. 

Inkhela goal awmchhun hi minute 70-naa lut a ni a, Celtic midfielder Callum McGregor chuan an lamah a ti lut - minute 62-naah Celtic centre back Nir Bitton chu hnawhchhuah a ni a, mikhual team Celtic vanneih zan a ni lo.

Steven Gerrard enkawl Rangers hian league match 22 an khelh tawhah vawi 20 hnehna an chang a, vawi hnih an khingpui an inhnehtawkpui - anmahni hnaih bertu Celtic aiin match thumin an khel tam a, point 19-in an sang fal bawk. 

Mahse, Rangers boss Gerrard erawh a pawr duh lo. Liverpool legend chuan, "Kan inkhelh hma khan kan inveng lawk tawh a, mi thusawi kan ngaithla dawn lo," a ti a, champion tur anga tun aṭanga sawi chu a pawm duh lo. 

Gerrard hian an hma­hruaina chu point 10 chauh a nih thu sawi telin, "Hnehna kan chan avangin ka lawm a, point thum kan hmu thei hi a hlu takzet - point 10-in hma kan hruai phah a ni," a ti a, point 19-in sang fal mah se Celtic-in match thuma an khelh tlem zawkna chu a hre reng.