ATP Cup-ah Nadal leh Djokovic

February 1-5 chhunga khelh tur 2021 ATP Cup-ah Rafael Nadal leh Novak Djokovic te awmna Spain leh Serbia an inlan dawn a, team 12 inelna tur zingah player ropui pahnih awmna ram hian ngaihven a hlawh zual ang.

Nikum khan Serbia hian Spain 2-1 in an hneh a, ram leh ram tennis inelnaah hian nomawi an chawi zui bawk; kuminah pawh anni pahnih hi rinkai an ni leh dawn a, Nadal leh Djokovic te inelna a ni tel dawn bawk.

ATP Cup khel tur hi ramin player ranking an neih san dana zirin teh a ni a, nikum khan ram 24 inlan mah se kuminah chuan Covid-19 vangin inelna tura tling ṭhenkhat chu an zin chhuak duh lo. Inelna thlengtu Australia chu wildcard pek an ni thung.

February 8 aṭangin Australian Open khelh a ni dawn a, Grand Slam khel tur player tam tak tan Melbourne khawpui thlen luh hma theihna kawng a inhawng dawn tihna a ni nghal bawk.