Newcastle an hnar leh tawh

Champions League khel tur Newcastle-in uiawm takin Liverpool an ngam lo a, fan-ten striker mamawh an inti hle - mahse, an chanchin hriat erawh a lawmawm lo. Wolverhampton Wanderers striker Jorgen Strand Larsen lakluh an tumna chu Wolves hian an lo hnar.

Magpies hian pound maktaduai 50 ngawt hum chungin Larsen khelhna Wolves hi an dawr a, mahse, hnar an ni. Newcastle hian Brentford forward Yoane Wissa chu lakluh tumin vawi hnih ngawt an lo dawr tawh a, hetah pawh an pawh an hlawhchham ve ve.

Hei vang hian Larsen lam an hawi a, mahse, Wolves-in an lo hnar leh ta - Liverpool nena an inkhelah Magpies-in striker an mamawhzia hmuh turin a awm a, Callum Wilson a chhuah bawk si avangin an buai ru tawh hle.

Wolves chuan Larsen hi hralh an tum loh thu an sawi - season hmasa khan Celta Vigo aṭangin loan-in an hawh a, goal 14 a khung hnuah a nghetin thla hmasa lawk khan £23mtd-in an la.

Hei vang hian Wolves tan Larsen hralh leh nghal chi niin a lang lo a, Manchester United lakah Matheus Cunha an chân tawh bawk. Wolves manager Vitor Pereira chuan, "Kan tan chuan player pawimawh tak a ni.

"Newcastle-in an dawrna chungchang hi kan sawi dun miah lo. Team tan a inpe a, training-ah pawh a inpek ngai rengin a inpe. Chak duh a ni a, theihtawp chhuah ṭhin mi a ni," a ti.

Magpies hian Wissa leh Larsen an dawr hma hian Hugo Ekitike (Liverpool), Benjamin Sesko (Manchester United) leh Joao Pedro (Chelsea) te an lo rim tawh a, mahse, club dang an thlang vek.