Aizawl West Derby: Kanan FC ngamtu Dinthar FC

GIG Motors MPL12-ah Aizawl West Derby hmasa ber chu nimin chhun khan khelh a ni a, R. Laldanmawia hmangin Dinthar FC-in Kanan FC 2-1 in an hneh. Dinthar FC general secretary Johny Lalrinchhana'n MPL Kick Off zanan, "Kananin engtik lai mahin min pha dawn lo," tiin a sawi a, a thusawi dikna hmuhin a awm.

Kanan tan result pawm a harsa dawn a, chutihrualin an intawn leh hun tur an nghakhlel sawt ang. September 22, Thawhṭanni zan dar 7:00-ah Aizawl West Derby vawi hnihna hmuh a ni dawn a, RG Stadium-ah entu an ṭhahnem khawp ang.

A goal lo

Chhun pachanga inkhel a ni nachungin ṭan phat aṭangin inkhel a nung a, goal chance hmuh tur a pawh a awm. Dinthar striker Jerry Lalchhanchhuaha'n box pawn aṭangin a pet over a, Kanan forward Lalthanpuia (Tepuia) pawhin box pawn aṭangin a volley a, Dinthar player per hnuah crossbar chungah chiah a kal. Hemi hnu hian Jerry-a'n goal sirah chiah a pet leh bawk.

Dinthar tlarhnung tan Tepuia a hnawksak a, mual vei lam aṭangin kawh zetin a pet a, mahse goal zawnah a kal lo. Tea Chinzah a dam tawh a, Maimawms tan bul rawn ṭanin mual sir lamah a hmuhnawm viau bawk. First half-ah goal hmuh tur a awm lo a, chutihrualin Kanan midfielder Lalthlanawma cross Lalthanzuala'n (TZ-a) six yard box chhung aṭanga a khung lo erawh goal khung ngeina tura ngaih a ni.

Sialhawk Express

Kum 13 liam taa MPL khelh ṭan a nih khan Danmawia'n a vanglai hun a hmang ṭan a, khatih hun lai khan Sialhawk Express hian a team telna apiang a champion pui emaw tih mai tur a ni. Sialhawk chhuanvawr hian I League-a Aizawl FC a champion pui hnuin East Bengal, Hyderabad FC leh NorthEast United tan te a khel a, boot khai hnaih tawh lamah hming a chher ṭanna Dinthar FC-ah a kir.

Coach Laldampuia'n a khelhpui ṭhin Danmawia'n match tin khelh a tlin dawn tawh lo tih a hria a, a ṭhat dan bera a inlan heih nan bench-ah a dah. Second half ṭan chiahah Danmawia hi a rawn lut a, captain armband a rawn hreng nghal. Danmawia hian Dintharah hian striker hna chelhin mual dinglam sirah a tawlh chho hnem tho bawk.

Danmawia inlar hmain Kanan player thar J. Lalbiakliana'n (Valpuia) goal chance a insiam a, box chhung aṭangin goal-ah pet mahse defender Lalhmangaihsanga'n a dang hman. Farkawn tlangval hian Chanmari FC aṭangin Dinthar hi a zawm a, Maimawms-ah hmun pawimawh a chang.

Minute 56-naah Danmawia'n box chhungah rilru fim a pu a, centre aṭanga ball vawrluh Sialhawk Express hian tauhfuh chiah lo mah se a per chu Tea Chinzah tan ball ṭha bik a ni a, Farkawn tlangval hian pet pial mah se mawi zetin goal-ah a lut.

Danmawia'n awmze neiin box chhungah ball a thawn lut leh a, Tea Chinzah tan ṭha viau mah se Farkawn tlangval hian a tlangzawh a rin loh avangin a khawih hman lo. Dinthar captain hi Kanan tlarhnung tan a hnawksak a, minute 84-naah Melvin Zomuana cross chu Danmawia'n vengtu karah mawi zetin a tauh lut.

Kanan an vannei lo

Dinthar captain Danmawia'n inkhel a rawn thlak danglam a, mahse Maimawms hi goal hnih an khung hnuah an inthlahdah hret a, Kanan goal bawh a na hrim hrim bawk. Substitute Lalruatfela'n box chhung aṭangin kawh zetin pet mah se Dinthar keeper Joel B. Lalramchhana'n ṭha zetin a dang.

Kanan goal bawh a na zel a, F. Lallawmkima'n penalty a hlawh chhuak dawn emaw ti mah se referee-in penalty pe loin yellow card a pe ta zawk. Chawnthansanga hote goal bawh a nat avangin Dinthar an talbuai a, Dinthar keeper Ramchhana'n a hna a tlin.

Hun tawp hma hretin Hmangaiha'n winger tlan chak Lalthuthlunga a titlu a, referee-in penalty a pe. Lunglei tlangval TZ-a'n penalty aṭangin a khung a, Ramchhana'n a dang thei ta bik lo. Injury time minute ruk pek belh mah se Kananin goal dang an khung thei lo a, Dinthar 2-1 in an chak.