BS-a enkawl Police an la ṭha reng

Mizoram Police hi I Day Football leh MPL12 match hmasa berah Aizawl FC lakah 5-0 ve vein tlawm mah se nimin khan I League club leh I Day Football champion Chanamri FC an chelh a, 1-1 in an inhnehtawk. GIG Motors MPL12-ah Lalbiaksanga Colney enkawl Police dah hniam an la thiang lo a, team ṭha zinga mi an la ni reng.

Nimin inkhelah hian FC Lalhmunmawia hmangin Chanamriin khung hma mah se Police-in Lalfakzuala hmangin first half-ah vek siphurh an sut. Police hian an recruitment thar player-te training vangin an chhawr thei lo a, kim lo chungin Chanmari FC nen an inhnehtawk.

FC-a goal

Chanmari FC-in ṭan phat aṭangin Mizoram Police an ngam nghal a, an goal bawh a na nghal. PC Rosangzuala'n chance ṭha hmasa hlah mah se FC Lalhmunmawia hmangin Chanamriin minute lina lekah goal an khung a, goal ṭha bik a ni.

CYMA Football best player Lalnunzira corner pet chu KC Malsawmsanga'n kheng kang a, far post-ah Police defender Lalhmunmawia'n (Ahmuntea) FC veng ṭha mah se Sairang tlangval hian a tauh goal tho. FC hian a club hlui lamah khung mah se uar takin a lawm duh lo.

Malsawm ruah

Tlai ni nema inkhel an ni a, ruah a sur bawk avangin chhun pachanga che hleithei lo Police player-te an khel thei a, ṭum dang aiin thahrui an ngah. Chanmari hi I Day Football champion ni mah se Police nen an inkhel tawk a, BS-a Colney hote hian MPL10 final-a an hneh Chanmari hi an hlau lo a, rilru takin an ngam.

First half-ah goal chance a tam lo a, ruah a sur tam hnuah Police goal bawh a nat phah hle. Police midfielder Lalbiakhlua'n (Hlutea) midfield-ah ball a sem kual a, Armed Veng tlangval hian minute 40-naah fing takin dinglama awm Lalbiakhlua (Biaktea) a pe a, Biaktea hian cross ball ṭha nei zuiin captain Fakzuala'n a tauh goal.

Chanmari goalkeeper Zothanmawia dem theih a ni lo a, Police-in Chanmari tlarhnung an ṭhiat ṭha a, goal ṭha bik a ni. First half-ah Chanmari chungnung hret mah se Police player-te an thawkrim a, 1-1 hi result awm tak a ni.

Muanawma Show

I League club Chanmariin point thum hmuh ngei an tum a, second half-ah an goal bawh a na hle. Police hian Aizawl FC lakah goal nga chhuah mah se Chanmari lakah erawh an insiamṭha a, goalkeeper F. Lalmuanawma a khel ṭha ve bawk.

Chanmari hian chance ṭha an insiam nual a, minute 48-naah Zirtea cross chu hnai tak aṭangin PC-a'n goal-ah pet mah se keeper Muanawma'n a dang hman. Goalkeeper Zothanmawia (T. Mawia) pet chhuah chu PC-a'n um lutin keeper chiah a hmachhawn mah se Muanawma a paltlang thei lo.

Coach Rochhingpuia'n bench ṭangin Michael Lalbiaksanga leh Johny Lalrinchhana te an luhtir a, goal an khung theih mai loh avangin striker Lalruatsanga an a belh leh bawk. Serchhip tlangval Ruatsanga hi goal hmaah rawn hlauhawm viau mah se goal a khung thei chuang lo a, Muanawma a langsar zui zel.

Muanawma'n a khel ṭha takzet a, Sawmsanga ball pet kawh ṭha tak a dan phei chu inkhel result ti danglamtu a tih theih. Hun tawp lamah Chanmari goal bawh a na zel a, Lalrinchhana Tochhawng leh Crespo Vanalhriatpuia te pawh an rawn ṭangkai hle. Police-in Chanmari hneh lo viau mah se Muanawma an nei a, Mizoram aiawha vawi tam feh chhuak tawh hian hun tawp hnaih lamah Johny leh Crespo te goal khung tur ṭha zetin a dansak ve ve.

Chhinga hoten goal an khung thei lo a, Aizawl FC laka 5-0 a tlawm Police nen 1-1 in an inhnehtawk. Chutihrualin Police erawhin kim loin I League club an chelh thei a, relegation zone chhuahsanin BS-a hote hi Lalsangzuala Hmar enkawl Saikhamakawn leh SYS chungah an awm.