Alcaraz tan hna a awlsam

Carlos Alcaraz chuan nimin zing lam khan US Open 2025 a khel ṭan, a match hmasa berah harsa vak loin Reilly Opelka a hneh - a hmabaka ding tur chu Mattia Bellucci a ni ang.

New York khawpuia tennis stadium hmingthang leh lar ber Arthur Ashe Stadium-ah Alcaraz hi a inlan a, a khingpui Opelka hi tualchhung mi a nih avangin ṭantu pawh a nei ṭha, mahse Alcaraz hian 6-4, 7-5, 6-4 in hnehna a chang ta tho.

Alcaraz chungnung

Grand Slam vawi nga champion tawh Alcaraz hian set tinah a khingpui service vawi khat zel a chhuhsak a, ama service a hum theih zel avangin a tan hnehna chan nan a tawk, hna harsa lutuk thawh tur a nei lo.

Spanish tlangval Alcaraz chuan, "Player ṭha leh tawnhriat nei tam nen kan inhmachhawn a ni a, ka tan thil chhinchhiah tlak tam tak a awm. A bik takin a service hmachhawn tur kha ka inbuatsaih nasa thei hle.

"A ball rawn vuak lo dawnsawn dan thiam a harsa deuh ṭhin a, set hnihna kan khelh lai phei kha chuan vannei takin a service ka chhuhsak thei hram chauh a ni a, a tir aṭanga a tawp thleng khan inthlahdah zeuh theih pawh a ni lo," tiin a sawi.

Alcaraz hian a vawi hnih nan US Open champion nih a tum, nomawi chawi mai bakah Jannik Sinner khuma world number 1 nih theihna kawng a inhawng mek a, hun ṭha bawhpelh loh a tum ang - number 1 ni tur erawh chuan Sinner chet danah a innghat tel ve bawk.

Hong Kong aṭangin

Nimin zing inkhel dangah Coleman Wong-a chuan American tlangval Aleksander Kovacevic chu 6-4, 7-5, 7-6 (4) in a hneh, chak tur hian darkar hnih leh a chanve chhung hun a hmang tling lo deuh a ni.

Kum 21 mi Wong-a hi world number 173 a ni a, chak tura rinkai pawh a ni lo. Mahse, tunah chuan Hong Kong player zingah Grand Slam huanga singles match bika hnehna chang thei hmasa ber a ni ta hial.

Open Era hi kum 1968 aṭangin an chhiar ṭan a, chumi hnuah chuan Hong Kong player zinga mellung pawimawh phun thei hmasa a ni a, qualifying kaltlanga invaw tling niin, a tan chuan hun chhinchhiah tlak bik a ni chiang hle.

Coleman Wong chuan, "Keima tan chauh a ni lo a, kan chhungkua leh Hong Kong mipui tan chuan thil lawmawm a ni," a ti. Mi tam takin lawmpuina an hlan a, major title 22 la thei Rafael Nadal pawhin a lawmpui thu a sawi.

Inkhel dang

Brazilian rawlthar duhawm Joao Fonseca chuan Miomir Kecmancovic a hneh a, a hmabaka ding tur chu world number 21 Tomas Machac a nih tawh avangin a tan hna a hautak chho dawn hle.

Kum 19 mi Fonseca hian darkar hnih leh minute 26 chhungin Kecmancovic hi 7-6 (7-3), 7-6 (7-5), 6-3 in a hneh, set thumna an khelh lai hian damlohna vangin enkawl lailawk ngai zuai mah se ṭha takin a khel tluan thei ta tho a ni.

World number 17 Frances Tiafoe chuan Japanese player Yoshihito Nishioka chu 6-3, 7-6 (8-6), 6-3 in a hneh ve bawk a, tualchhung tlangval Tiafoe hi tun hnai kum thum chhunga semifinal vawi hnih lut thei a nih avangin dah hniam chi a ni dawn lo.

Holger Rune erawh awlsam takin a chak mai bik lo, a khingpui Van de Zandschulp chu 6-3, 7-6 (7-4), 7-6 (7-2) in a hneh a, inkhel dangah seeded pakuana Karen Khachanov chuan Nishesh Basavareddy chu 6-7 (5-7), 6-3, 7-5, 6-1 in a hneh ve bawk a ni.