Inter Milan tlarhma an hriam

Thawhṭanni zan khan Inter Milan chuan Serie A season thar bul an ṭan ve chiah a, goal nga an khung nghal - Cristian Chivu enkawl Inter hian an mikhual Torino chu 5-0 in an sawp.

San Siro-a inkhel an ni bawk a, mualneitu Inter Milan chuan a tir aṭanga a tawp thlengin inkhel an thunun. Alessandro Bastoni-a tauh luh mawi tak chu Marcus Thuram-a goal khungin a zui a, chawlhlawk hmain si hnih faiin hma an hruai.

Second half tir lamah Torino midfielder Gvidas Gineitis-a back pass na tawk lo chu Lautaro Martinez-a'n a nangching hman a, laklawk nei miah loin Inter Milan captain hian a tlawh lut.

Inter an phur tial tial a, goal khung an duhtawk mai lo - Thuram bawkin chiang takin a tauh lut a, an goal hnuhnung ber chu Ange-Yoan Bonny khung a ni thung, goal luh dawn hian Torino tlarhnung lamin an tisual a, an fimkhur loh an tuar.

Inter Milan coach Cristian Chivu chuan, "Ka naute khan Serie A match hmasa ber kan khelh hmain inbuatsaihna an nei ṭha em em a, an thawhrim rah chu a takin kan hmu. Kan khelmuala season bul kan ṭan dan hi a duhawm hle.

"Player ka nih lai khan San Siro hi ka tualchaina hmun a lo ni tawh ṭhin a, manager nih hnua han kir leh meuh chu a boruak a danglam khawp mai, a bul kan ṭan fuh avangin a tawp thleng tha thlah loa beih kan tum ang," a ti.

Season hmasa khan Inter Milan hian Napoli an tluk lo a, an nomawi an hloh. Manager thar Chivu hoin champion an tum dawn a ni a, champion lai Napoli nen an inum na hlein a rinawm.