Arsenal an la bazar zo lo

Football bazar lai a ni a, club hrang hrangah player lut leh chhuak an tam ta hle - Arsenal pawh an la bazar zo lo, defender Piero Hincapie chu Bayer Leverkusen aṭangin lak an tum mek.

Gunners hian veikhawr Hincapie hi lak an duh ngei a, Ecuador international pawh hian Mikel Arteta hnuaia khelh a duh. Bundesliga club tana a contract neih laiah hian pound maktaduai 52-a lei chhuah theih a ni, a man a tlawm dawn vak lo.

North London club hian nipui bazara player lak nan pound maktaduai 200 chuang an hmang tawh a, tunah hian an player neih lai - Fabio Vieira, Reiss Nelson leh Oleksandr Zinchenko te chu chhuak thei dinhmunah an ding mek.

Porto chuan Arsenal centre back Jakub Kiwior lak tum an dawr bawk a, an dawrna hmasa chu hnawlsak ni mah se Portuguese club hian an dawr nawn ngei a rinawm; Kiwior a chhuah chuan Hincapie hi an mamawh zual dawn a ni.

Totteham Hotspur pawhin Hincapie hi an ngaihven nia sawi a ni a, mahse inremna an la nei bik lo. Gunners hian hmanni lawk khan Spurs lak tum Eberechi Eze chu an lo lak khalh tawh a ni.