Venus Williams chak lo nghal

US Open 2025 a match hmasa berah Venus Williams a chak lo nghal a, tennis a chawlhsan thu la sawi chiah lo mah se New York khawpuia inelna a hmachhawn hnuhnung a nih tawh a rinawm.

Kum 45 mi Venus hian a vanglaiin US Open nomawi hi vawi hnih a lo la tawh, tun ṭumah hian duhsak takin wildcard pek a ni a, a vawi 25 nan US Open hi a khel, mahse 6-3, 2-6, 6-1 a chak loin a zinkawng a tawp nghal.

American star Venus Williams chuan, "Rilru leh taksa hrisel nuam taka ka inkhel thei hi ka lawm a, hliam leh hrisel loa awm hrehawmzia ka hriat avangin tennis ka khelh theih hi chuan ka ngaihlu thei hle.

"Ka hma hunah eng nge lo thleng tur hre lo mah ila, hun hlimzawm zawk a la inher chhuah ka beisei," tiin a sawi a, a tan chuan tournament lian lo zawk khelh pawh thil hautak a tling tawh ang.

Inkhel dangah Madison Keys pawh a chak lo! Australian Open champion Keys hian world number 82 Renata Zarazua-i chu 6-7 (10-12), 7-6 (7-3), 7-5 in a hneh lo. Grand Slam champion a nih hnua New York khawpuia a inlan lehna hmasa berah beisei a phak lo.

Seeded parukna Keys chuan, "Tihsual ka nei tam lutuk kha a mak ka ti, inbuatsaihna nei ṭha viau mah ila match kan khelh lai khan inrintawkna reng reng ka nei thei lo," tiin a sawi a, a chak loh chhan chu ama tihsual tam lutuk chu niin a sawi bawk.

Keys hian vawi 89 tehmeuh mai unforced errors a nei a, heng zingah hian double fault vawi 14 a tel - a tihsual vanga a khingpui in point a hmuh hi a tam tham hle a, chak loh pui tham chu a ni.