Neymar leh Vini an ko lo

Brazil coach Carlo Ancelotti chuan Chile leh Bolivia nena World Cup qualifying khel tur squad a puang a, forward ṭha Neymar chu hliam vangin a tel lo - Vinícius Júnior pawh a ko lo a ni.

Barcelona leh Paris Saint Germain forward hlui Neymar hi ram tan a inlan lo rei ta hle, kum 2023 October khan Brazil tana a feh chhuahna lamah a inhliam a, hun rei tak a chawlh zui phah - a hnuah club tan inkhel leh tawh mah se ram tan a la inlan leh lo.

Brazil hi World Cup khel turin an tling chiang tawh a, thapui thawh an ngai tawh rih lo. Chelsea rawlthar Estevao chu koh zingah a tel a, West Ham midfielder Lucas Paqueta pawhin kohna a dawng bawk.

Real Madrid a enkawl laia Ancelotti hman thiam tak chu Vini Junior a ni a, Italian manager hian Brazil a enkawl hnuah pawh a chhawr dawn tih a chiang, mahse tun ṭumah chuan a ko rih lo, a koh loh chhan hi hman duh loh vang erawh a ni lo.

World Cup atan Brazil hi tling tawh mah se, khawvela ennawm ropui ber atan hian inbutsaih an ngaih avangin team nghet tak an din a ngai. Tun ṭumah hian tawnhriat nei ṭha Alisson, Marquinhos leh Casemiro te chu koh zingah an tel a ni.