Liverpool an 'Pul' dawn em ni?

Gérard Houllier leh Rafael Benítez-a hun tawp lam te, Roy Hodgson-a enkawl lai te, Kenny Dalglish kir lehna te, Brendan Rodgers-a hun tawp lam tea Liverpool fans thu hriat ngun chu, "Liverpool an pul," tih hi a ni.

 

Mahse, he mangchhia aṭanga khai chhuaktu Jurgen Klopp-a hruaina hnuaiah erawh English football mai ni lo, European football-a team hlauhawm ber pawl an ni a, Liverpool tih hming chu club lianten an hlau ṭhin.

 

Tun hnaiah erawh he team hmuhnawm hian an hmuhnawmna an hloh a, team hlauhawm tak kha team zuamawmah an chang chho mek - Thawhṭanni zan khan Southampton lakah 1-0 in an tlem leh ta. 

Reds hian an league match hnuhnung pathumah chak an nei lo a, point kua hlawhchhuah theih aṭangin point hnih chiah an hlawh - an hmabak chu Manchester United an ni!

Jurgen Klopp-a'n Liverpool-a enkawl hnuah a duh zawng player lalutin,a system nena inmil loa a hriatte a chhuahtir a, chung zingah chuan Danny Ings-a tel. 

English striker form em em mai hian amah duh lotu coach hmuh lai ngeiin minute hnihna lekah goal hmahruai a khung zui a, hun tawp thlenga goal dang a luh loh avangin Saints chakna a ni zui.

Ings hian James Ward-Prowse-a freekick aṭanga ball kal chu Reds goalkeeper Alisson-a man theih loh turin a pet khum a, Liverpool an hawihai. Kum 28 mi Ings hian tun season-ah hliam vangin league match 13 chauh a la khel a, hetichung hian goal sarih khungin assist vawi thum a nei tawh - season hmasaa league goal 22 a khung kha tihpalh a ni lo tih a pholang. 

Players inhliam ngah tak Jurgen Klopp-a'n tlarhnung laiah rin loh takin captain Jordan Henderson chu Hendo ang thoa midfielder Fabinho nen a inkawptir a, a tisual a nih chuan dem tur a nih thu a sawi zui. 

Klopp-a'n a mawhphurhna a nih tur thu a sawina pawh rei a liam hmain Reds tlarhnungin goal an chhuah nghal a, German coach tan hmuh nuam a ni lo. 

Thiago Alcantara chuan October 17 hnua a vawi khat nan bul ṭan mah se a team tan danglamna a thlen thei lo a, khawvel full back inkawpa ṭha ber anga mi tam takin an ngaih Andy

Robertson leh Trent Alexander-Arnold-ten an 'class' angin an khel chhuak lo bawk.

Premier League top scorer Mohamed Salah leh Robert Firmino-ten target zawnah pet an nei miah lo a, Sadio Mane-a'n a ṭhiante ai chuan khel ṭha deuh mah se goal-a khung thei bik lo.

Liverpool-in champion khelhin an khel lo a, team hmuhnawm tak ni ṭhin kha hmuh tur an awm lo - Jurgen Klopp-a'n duh ni se player inhliam chhuanlam tur a nei ṭha a, Reds player inhliam neih ang zat hi nei se, team tam zawk chuan Champions League khelh pawh an sawi ri ngam lo ang. 

Mahse, Saints nena an inkhel bikah chuan inhliam ngah hi chhuanlam atan hman a thiang lo - mualneitu team hi an ṭhat dan berin an khel bik tlat lo. Goalkeeper Alex McCarthy chu Covid-19 kai vangin a inkhel thei lo a, December 2017 hnua a vawi khat nan Fraser Forster chuan league match home-ah a khel. 

Saints manager Ralph Hasenhuttl-a'n hliam vangin centre back Jannik Vestergaard, defensive midfielder Oriol Romeu leh forward Che Adams-te chu a chhawr thei lo vek a, winger Moussa Djenepo chu minute 32-naah hliam vangin lakchhuah a ngai bawk. 

Tlarhnung lamah Jack Stephens, Jan Bednarek leh Kyle Walker-Peters-te fak tlakin an khel bawk a, Liverpool goal nawr na tur  dang chattu an ni - an khel ṭha takzet. 

Liverpool-in hnehna chang zo lo mah se hma an hruai chhunzawm a, an dinhmun erawh a him lo hle - pahnihnaa awm Manchester United nen an point hmuh zat a inang a, match khatin an khel tam zawk. 

January 17 zanah team pahnih hi an inhmachhawn chhunzawm dawn bawk a, Anfield-ah Red Devils an leng ang - he inkhel hian tun season champion tur thui takin a hril thei dawn, Reds hian January 8 zanah FA Cup third round match khel turin Aston Villa an lenchilh leh phawt ang. 

Manchester City thaibo a thiang ta lo bawk - table-ah pangana ni mek mah se Liverpool aiin match hnihin an khel tlem a, match hnihah hian hnehna chang ta se point hnihin Liverpool an tlansan daih thei. 

Tun season hi Premier League ngaihnawm ber ṭum ang hial pawhin a sawi theih - hmahruaitu Liverpool leh 10-na dinhmun luah mek West Ham inthlauhna hi point sarih chauh a ni a, 11-na Arsenal thlengin Champions League an la beisei ngam!

Liverpool-in a zawna West Brom (1-1) leh Newcastle United (0-0) an inhnehtawkpui hnuin Southampton an ngam lo a, Jurgen Klopp-a lawm thei lo. Merseyside club hi an vanduai ti pawhin a sawi theih - Saints laka an penalty hmuhna ngei tur nia ngaih pahnihah penalty pek an ni lo a, penalty kha pek ni ta se inkhel result a danglam ngeiin a rinawm. 

Georginio Wijnaldum-a shot chu Jack Stephens chuan a kutin a dang a, forward Sadio Mane chu Kyle Walker-Peters chuan a ti tlu bawk - mahse, penalty pek an ni lo ve ve.

Klopp chuan, "Handball kha penalty ni ngei turah ka ngai a, mahse, fourth official lam ka va en chuan an ennawn vek tawh thu min lo hrilh - penalty a nih loh dan min hrilhfiah thei tur ka hre lo. Hetiang hunah hian kan vanduai ṭhin. 

"Referee Andre Marriner-a'n Mane chunga thutlukna a siam dante kha ka hrethiam lo - Mane hi tupawhin tluk der ching anga an sawi a nih chuan fiamthu nuihzatthlak tak a ni ang. Team dangin penalty an hmuhna turah a hmu lo a ni," a ti. 

German coach a ang tui laklawh a, an elpui Manchester United thlengin a kap zui. Klopp chuan, "Manchester United hian kum hnih chhungin, Anfield-a kum nga leh a chanve hun ka hman tawh chhunga penalty ka hmuh zat aia tam an hmu tawh tih ka lo hria a, chu chu ka thiam loh a nih leh nih loh ka hre lo a, engtia thleng thei ngei a nih pawh ka hre lo," a ti!

Kum 53 mi coach hian an chak loh erawh pawmin, "Thil thleng zawng zawng kha chhuanlam atana hman erawh ka tum lo a, kan thlak danglam theih tawh loh avangin thutlukna chu kan zah tur a ni. Kan khelh dan erawh kan thlak thei a, chu lamah chuan kan insawrbing ang," a ti a, an insiamṭhat tur thu a sawi.

Klopp-a lawm loh em em laiin Saints manager Ralph Hasenhuttl erawh lawm avangin a ṭhingṭhi hnawk a, a hlim tih hai rual a ni lo. Austrian manager chuan, "Ka mittui a luang ngei a, mahse, thli a thawt deuh vang a ni," a ti!

Saints manager chuan sawizawmin, "Ka nauten an theihna zawng zawngin an bei tih ka hmuh khan ka chhuang takzet a ni. Liverpool lakah chuan sawiselboa khelh a ngai a, chutiang chuan kan khelin ka hria," a ti a, a hlim hle.