Saliba intuaihriam dawn

Arsenal ṭantuten beiseina sang tak nena an thlir mek William Saliba chu Nice lamah loan hmanga kaltir a ni. French Ligue 1 club tan hian tun season tawp thleng a khel ang.

French rawlthar Saliba hian 2019 khan Saint-Etienne aṭangin Gunners a zawm a, London club hian rawlthar defender manah hian pound maktaduai 27 an seng. Ligue 1 club tan hian loan hmangin a khel let lehnghal a, tun season ṭan dawn khan North London-ah a kal chiah.

Manager thar Mikel Arteta-a'n pre season an hman laiin Saliba hi a chhawr a, mahse kum 19 mi defender hian manager mit a tlung tawk lo. Season pangngai an ṭan hnuah junior team lamah intuai hriam tura hun hmantir a ni.

Arsenal senior team tana khel turin manager berin a la ringtawk lo, chuvangin khelhna hmun tur a zawn a ngai. Ligue 1 lama 12-na ni lai Nice hian Saliba hi an kawl chhungin a hlawh an pe vek dawn a, loan fee erawh an pek a ngai lo ang.

Gunners technical director Edu chuan, "William Saliba hian theihna sang tak a nei a, a lakah beisei kan nei sang bawk. Hliam leh hri leng vangin a inkhel tam tawk lo, season chawhnu lam kan hman turah hian Nice aṭangin hmasawnna a chhar belh ngei kan beisei," a ti.

Arteta-a'n thlasik bazarah a player neihsa chhuahtir nual a tum, defender Saliba hma hian Sead Kolasinac pawh tun season tawp thleng cham turin Bundesliga club Schalke lamah an kir tir tawh bawk.