Curry awmna GSW an danglam

Stephen Curry-a'n a thiam a la theihnghilh lo a, season hmasa lama team talbuai Golden State Warriors chu kawng dikah a hruai leh ta. Golden State hian nimin zing khan Sacramento Kings chu 137-106 in an hneh.

American star Curry-a'n point 62 zet a neih hnuah a khel ṭha chhunzawm. Kings lakah hian minute 31 inlanin point 30 a nei hman a, ani bakah hian Andrew Wiggins (16 points) leh Kelly Oubre Jr (18) ten an thawhhlawk bawk.

Season hmasa khan GSW hian hliam vangin Curry an chhawr thei lo. An thiampuipa tel loin an che thei lo a, regular season pumpuiah vawi 15 chauh chakin ṭum 50 tehmeuh an tlawm thung.

Kuminah erawh Curry hoin an inlan thei tawh a, match hmasa pasarihah ṭum li an chak thei. Western Conference lamah an mahni aia chak tam chu team pathum chiah an awm - Los Angeles Clippers, Phoenix Suns leh Los Angeles Lakers te vawi nga an chak tawh.

Warriors hian Ningani zing dar 8:30-ah Western Conference hmahruaitu Clippers an hmachhawn leh ang.