Round hnih chhunga Joshua hneh inringtu Fury

British boxer rothap Tyson Fury chuan Anthony Joshua chuan inrintawkna lamah harsatna a nei niin a sawi a, round hnih chhung leka a hneh theih tur thu a sawi bawk!

Boxer pahnih hian inhmachhawn ngei an duh thu an tichiang tawh a, boxer pahnih aiawhte chuan indawrna an kalpui mek - a thleng thei a nih ngat chuan khawvel nghawrnghing khawp inhnek a ni ang. 

Joshua hian December-a Kubrat Pulev a hneh hnu lawkah Fury nen an inhmachhawn a nih chuan a 'nghaisak' tur thu a sawi a, mahse, Fury ngaihdan erawh a dang thung. 

British boxer chuan, "Miin an sawi ang em ema boxer ṭha a niin ka hre lo a, amah ngei pawhin chu chu a ring tawk lo. Hun rei tak chhung fight neih duhin kan lo sawi tawh a, min pumpelhna an zawng char char - tunah chuan a thleng dawn ta," a ti. 

Kum 32 mi Fury chuan, "Joshua fight hnuhnung pahnih en ila, a 'form' lo em em tih kan hmu - kei erawh ka khel ṭha a, tunah hian dinhmun ṭha zawk ka ni," a ti a, Joshua-a cho hle. 

Fury hian WBC world title a kawl mek a, Joshua hian IBF, WBO leh WBA title a kawl thung - fighter pahnih hi an inhmachhawn thei a nih chuan heavyweight fight-a kawnghren liantham pali an inchuh hmasak ber a ni ang.