League Cup semifinal Zanin dar 1:15-ah Manchester Derby

League Cup semifinal hnuhnung zawk chu zanin dar 1:15 hian Old Trafford-ah khelh a ni dawn a, Manchester United leh Manchester City an khel ang. Nizan khan Tottenham Hotspur leh Brentford ten final khel tur an zawng a, result kan hre hman lo.

Kumin League Cup hi Covid-19 vangin inelna kalphung thlak hret a ni a, ṭum dangah semifinal hi double leg-a khelh ṭhin ni mah se kuminah erawh vawi khat chauh khelh a ni dawn. Chutihrualin neutral ground-ah khelh a ni dawn lo a, tie draw-a vannei zawk Manchester United mualah khelh a ni ang.

Tun season hi a danglam hle. December thla tir khan Manchester United-in khualmualah RB Leipzig 3-2 a an hneh loh avangin Champions League aṭangin an tla a, manager Ole Gunnar Solskjaer ban duhtu an tam hle. Thla khat pawh a ral hmain Premier League-ah Man United chu pakhatnaa awm thei dinhmunah ding a, an phur thar hle.

Ole hote hian match sarih an khel leh tawh a, chak loh an nei lo. United hian chanchin ngaihnawm tak tak an nei a, chung zingah chuan Leeds United 6-2 a an sawp te pawh a tel thei ngei ang. Chutihrualin RB Leipzig laka an tlawm zawh chiaha Man City nen goal awm loa an inhnehtawk kha United inrintawkna petu a tih theih.

Solskjaer hian Pep Guardiola hi ṭum ruk a hmachhawn tawh a, vawi thum chakin vawi hnih a chak lo. Norwegian manager hian an chakna inkhel aiin an inhnehtawk ṭum awmchhun hi a ngaihlu zawk. A chhan chu, United hian hnehna an chan ṭum hian defensive game khelin counter attack hmangin goal a khung.

Old Trafford-a an inhmachhawn hnuhnun berah erawh Man City-in chak lo thei an ni tih inhriain tlarhnung venhim an ngai pawimawh tawh a, Solskjaer-a hoten vuak letna tur ṭha an neih loh ang chiahin Man City pawhin chance ṭha an insiam thei lo. United-in Man City an chelh hnuah inrintawkna an neih phah a, club dang chet chhiat vanga league-a an dinhmun sang chuan phurna nasa tak a pe tel bawk.

Result thlir chuan Man United hi team ṭha zawk an ni ang a, khelmuala chet dan en erawh chuan Man City an ṭha zawk. Pep Guardiola-a'n inkhel thunun ngaihthah si loin goal venhim a ngai pawimawh ve ta. Chelsea nena an inkhelh zawh khan Pep-a'n season hnih thum liam taa kan khelh dan angin kan khel chhuak a ti a, an khelh danah a lungawi.

Stamford Bridge-a Man City-in hnehna an chan hian Pep-a hote chiang takin hnehna an chang a tih theih a, statistics aṭanga teh erawh chuan Frank Lampard-a hoten chungnunna an nei. Chelsea hian 55% ball an chang a, ball pass chungchangah pawh vawi 654 ball inpe kualin City aiin vawi 100-in an pass tam.

Blues chet dan hi Pep-a naute khelh dan zawk tur ni awm takin lang mah se an khingpuite khelh dan zawk a ni tlat. Amaherawhchu City hian goal zawnah vawi ruk an pe ta, Chelsea aiin goal zawnah a let thumin an pet tam. Pep-a naute goal hmaah an hlauhawm a, awmze nei mang loa in pass vak vak an nei lo bawk nen an inkhel a hmuhnawm hle.

Ole Gunnar Solskjaer-a'n Bruno Fernandes leh captain Harry Maguire tel loin team a rem ngam lo tih theih a ni a, Man City nen pawh player pawimawh pahnih hi an inlan a rinawm. League Cup a nih miau avangin David de Gea aiah Dean Henderson a luh a rinawm a, player dang erawh hriatthiam a har lehzual.

Hrem vangin Edinson Cavani a khel thei dawn lo tih a chiang a, chutihrualin Aston Villa lama Anthony Martial-a'n goal a khung avangin United tan manganna tur a awmin a lang lo. Solskjaer-a'n tun season-ah first eleven nghet a nei lo a tih theih a, chutihrualin Marcus Rashford erawhin hmuh pawimawh a chang ang.

Man City-in an match hnuhnung berah Covid-19 vangin Kyle Walker leh Gabriel Jesus bakah Eric Garcia, goalkeeper Ederson leh winger Ferran Torres te an hmang thei lo. Coronavirus vang ni loin defender Aymeric Laporte pawh malpui hliam vangin a khelh theih a beiseiawm loh.

Amaherawhchu player langsar ṭhenkhat tel lo hian Man City-in Blues an hneh thei a, Kevin De Bruyne leh Raheem Sterling te an dam ṭhat chuan an goal bawh a na dawn tih a hriat. 

Phil Foden leh Ilkay Gundogan te khelh ṭhat ṭum nen a inrual phei chuan Man City hi dan a harsa dawn a, hei bakah hian Pep-a tana thu lawmawm chu John Stones-a'n tlarhnungah a rintlakzia a pholang leh tawh a, Rodri pawhin midfield thunun turin theihna sang tak a nei bawk.

League Cup bikah hian substitution panga a hman theih dawn a, dan thar hian coronavirus vanga player ṭha chan hnem Man City a puih tam a rinawm loh.