Bergkamp thlaktu Ozil - Pires

Arsenal tana Premier League nomawi vawi hnih chawi tawhtu Robert Pires chuan Gunners legend Dennis Bergkamp thlak thei tur chu Mesut Ozil a nih thu a sawi chhuak.

Germany international Ozil hian tun season-ah Arsenal tan goal sarih a khung tawh a, ṭhiante goal khung tur siamsaktu a nih bakah a hmawr bawk thei a nihzia a ti lang tawh.

Arsenal tana goal 84 khung thei Pires chuan, "Season hmasa aia Ozil ṭhat tawh zawkna chu goal khung lamah hma a sawn hi a ni a, league-ah goal 10 chuang khung turin theihna a nei. Dennis Bergkamp leh Ozil te hi ka player duh tak mai an ni, a chhan chu anmahni aia team an ngaihpawimawh zawk vang a ni," tiin a sawi.

Dutch legend Berg-kamp khan North London club tan hian match 315 khelin goal 87 a khung a, a tirah chuan midfielder ni mah se Gunners-ah chuan striker pui tura hman ṭhin niin Thierry Henry nen hmatawngah an inkawp rem thei hle.

Kum 43-a upa Pires chuan, "Ozil hian theihna a nei sang em em a, tuna a khelh dan hi chu tun hma lama Bergkamp ang mai kha niin team tan a
ṭangkai takzet," a ti.

Arsene Wenger-a'n Real Madrid aṭanga a lakluh Ozil hian Arsenal tan kum 2018 thleng daih contract a nei mek a, tunah hian pawt sei tura hmalak mek a ni. Arsenal hian Inrinni zanah Premier League match khel turin Manchester United an lenchilh ang.