Rinpuia chak awlsam

11Even Sports TTFI Natio-nal Ranking Table Tennis Cham-pionship, 2016 chu R. Dengṭhuama Indoor Stadium, Mualpuiah khelh mek niin Mizo player beiseiawm Lalrinpuia chuan nimin khan Youth Boys Singles-a a match hmasa pahnihah hnehna a chang nghal.

Maubawk rawlthar Rinpuia hian a match hmasa zawkah Shresth Kumar chu 11-3, 11-2, 11-6 (3-0) in a hneh a, a match hnihnaa a hmachhawn tur Chhattisgarh aiawh Ayew Sharma erawh a inlan thei lo thung. Rinpuia hian nimin tlai khan an match thumna khelin a result kan hre hman lo.

National Youth champion nilai Rinpuia chuan, "Nikhatah match khat aia tam khelh a ngaih avangin a awlsam lo a, inthlahdah miah loa inelna hmachhawn reng a ngaih avangin a hautak ve hle," tiin Vanglaini palai a hrilh.

Youth Boys Singles-ah hian Mizo player dang Lalruatsanga chuan a match hmasa berah Prithvi Dey chu 2-11, 11-8, 5-11, 9-11 (3-1) in a hneh ve bawk a, Stephen Lalchhanhima chuan 8-11, 3-11, 8-11 (3-0) in Agra Das a hneh ve bawk - hetihlai hian Lalhunhlua erawh a vanduai thung.

Mizo player zingah Lalhunhlua chuan Thawhṭanni khan qualifying round a paltlang a, ani chiah hi Mizo zinga he category bika main draw lut awmchhun a ni.