Lampard-a'n MLS a chhuahsan A chawl dawn nge a inkhel zel dawn?

Frank Lampard chuan a khelh mekna Major League Soccer club New York City a chhuahsan tur thu a puang a, Chelsea midfielder hlui hian MLS lamah inlan zui a tum tawh loh avangin football a khelh chhunzawm zel dawn nge coaching lamah a kal dawn? tih chu zawhna awm nghal a ni.

Kum 38-a upa midfielder chuan, "NYFC-a ka hun hman chu a tawp ta. He hmuna ka cham chhunga duhsakna leh hmangaihna ka chunga inlantir avang khan lawmthu ka sawi a, ka teammate te khelhpui in nuam em em reng bawk. He hmuna ka cham chhungin ka in ang maiin ka khawsa a, thinlunga vawn reng tur sulhnu tam tak hnutchhiah chungin ka chhuahsan dawn a, ka hmalam hun zela ka tih tur chu ka puang thuai ang," tiin instagram lamah a ziak.

Lampard-a sulhnu

Chelsea player neih tawh zinga ropui ber anga hiala an chhal Lampard hian New York-a kum hnih a cham chhungin match 31-a khel a, goal 15 a khung sak. Englih midfielder hian July 2014 khan New York City zawm turin con-tract a ziak a, mah se NYFC nei-tu te hi Manchester City neitute tho an nih avangin Premier League club lamah hian loan-a kaltir nghal a ni a, New York fan-te an lungawi lo hle.

Chelsea tan goal 211 khunga club tana goal khung hnem ber ni thei Lampard hian City-ah season khat loan-a hun a hman chhungin match 38 a khelh sak a, goal riat a khung. New York lama a kir hnuah Lampard-a'n beisei a phak lo a, kum 2015 khan match 10-a inlan sakah goal thum chiah a khung. Hliam vanga match tam tak a khelh loh bawk avangin Lampard hi 'MLS-a player lakluh zinga chhe ber' ang hiala sawi a ni.

A tlu hlen lo

Frank Lampard-a'n sawi-selna zawng zawng huaisen takin a tuar a, Chelsea legend hi mi ṭhenkhat sawiselna avanga hnual mai mai chi erawh a ni lo. Kum 2016-a herchhuah meuh chuan New York tan inelna hrang hrangah match 20 khelin goal 12 a khung sak a, September 1 khan New York khawpui chuan Mayor office hmalaknain 'Frank Lampard Day' an hmang hial a, he hun hi khawpui ti hmingṭhatute pualin an hmang ṭhin.

MLS-a player hlawh hnem pangana (pound maktaduai 4.52) ni phak Lampard hian 'Frank Lampard Day' lawm nan goal a khung zui a, September 1-ah hian DC United nen inkhelin 3-2 in hnehna an chang a, goal hnih a khung - a hma lawka MLS club-in player an lakluh tawh zinga chhe ber ang hiala an sawi kha New York City mawina a ni.

Khawiah nge Lampard

Chelsea tan a khelh laia lea-gue nomawi pathum chawi thei Frank Lampard hian inkhelh chawlhsan a tum a nih chuan a club hlui Chelsea lamin coaching staff zinga tel turin an duh nia sawi a ni a, khawthlang media-te chuan he thu lengvak hi titi tui berah an nei leh der tawh.

England striker ropui ṭhin leh BBC Sports 'Match of the Day' presenter ni lai Gary Line--ker chuan October khan Frank Lampard hi New York khawpuiah a titi pui a, Leicester City striker hlui hian Lampard chuan coaching lama kal a rilruk thu a hrilh niin a sawi a - nakkum aṭangin Chelsea bench lama coaching staff zingah Lampard kan hmu a nih pawn a mak lo ang.

Gerrard dinhmun

Frank Lampard chungchang sawi rualin Liverpool midfielder hlui Steven Gerrard chanchinin ngaihven a hlawh ve nghal. Captain Fantastic hian Los An-geles Galaxy-a a contract neihlai chu tun kum tawp rual hian a hmang zo dawn a, MLS club hi a chhuahsan ngei rin a nih avangin kum 36-a upa midfielder hi a club hlui Liverpool lamah coaching staff zinga tel turin a let dawn niin an sawi - Reds manager Jurgen Klopp chuan Stevie G hi Liverpool lamah a let duh a nih phawt chuan a tan hmun ruak a awm reng thu a sawi tawh.