MVA Tourney Vawiinah mipa semifinal

Mizoram Volleyball Associa-tion buatsaih Samsung 3:16 Plan Solution MVA Invitation Tournament chu TNT volleyball court-ah khelh chhunzawm zel a ni a, vawiin hian mipa semifinal khelh tur a ni.

Semi final hmasa zawkah pool A leader Chhinga Veng VC leh Pool B runner up 3rd MAP team an inhmachhawn dawn. League round-ah 3rd MAP hian 3-0 in hnehna an lo chang tawh. Inelna neih hnuhnung pahnihna final lut thei MAP hian a zawna a vawi thum nan a ṭha pahnih zinga tel an tum ruh dawn a, setter Tharnghaka a chet ṭhat a ṭul ang.

Chhinga Vengin beisei angin la khel chhuak lo mah se semifinal an lut ta tho a, league round lama an hneh loh laka phuba la tur chuan Karnataka state player pathum Shravan, Ashwal Rai leh Varun te an theihna tak tak an pholan a ṭul tawh.

Inelna thlengtu TNT-in ṭantu an nei ṭha a, anni hi group B-a pahnihna niin an khingpui tur Hunthar VC hi hneh loh nei loa semi final lut thei an nih avangin an inkhel hi a hmuhnawm dawn. Hunthar hian Tamil Nadu state player Selva Prabhu leh S. Karthik an nei a, an khingpui tur TNT erawh tualchhung player-a innghat an ni thung.

Power Deptt-in final lut

Hmeichhe inelna lamah Power Department SC-in final an lut tawh. Thawhṭanni tlai inkhelah Power Dept. hian Bethlehem Vengthlang VC lakah 25-15, 25-11, 26-24 (3-0) in hnehna an chang. Nizan khan hmeichhe semifinal hnuhnung zawk khelh niin Electric Veng VC leh Durtlang VC te an inhamchhawn a, inkhel result kan hre hman lo.