Goa leh Mumbai inhmachhawn dawn

Thawhṭanni zanah Indian Super League match a awm lo a, zanin dar 7:00 hian FC Goa chuan Mumbai City an mikhual dawn thung. Goa hian an match hnuhnung berah NorthEast United hneh mah se table mawngphah an la luah mek a, Mumbai hian pathumna dinhmun luahin hnehna an chang thei a nih chuan table chung berah Delhi Dynamos an luahlan thei ang.

FC Goa-ah Mizo player an awm lo a, Mumbai City-ah erawh Lalhmangaihsanga Ralte (Sena Ralte), David Lalrinmuana leh Lalchhuanmawia Fanai te an awm thung. Aizawl FC midfielder hlui David-a'n beisei angin Mumbai club-ah hmun a la chang phak meuh lo a, Sena Ralte erawh pla-yer pawimawh pawl a ni thung. Chhuan-tea'n Vanglaini palai hnena a lo sawi tawh angin Mumbai City squad zawm tawh mah se Lengpui defender hi a hliam a la damkawr deuh avangin chhawr ngam a la ni lo.

Chhuantea chuan, "Ka in zaina a la rei lo tih an hriat avangin hotuten risk an la ngam lutuk lo a, training pawh midang angin a full-in ka la nei thei lo," tiin Vanglaini palai hnenah a la dam chian theih loh thu a sawi.