Vawiinah Mizo palian inchai A kang dawn - Sangliana; A bet dawn - Nienga
Mizo inchai ngainatute tan vawiin hi Lammual pan hun a ni. Mizoram Wresling Association buatsaihin Mizo Inchai (Title fight 2016) hmuhnawm en tur a awm dawn a, palian champion lai Lalsangliana hmachhawn turin PB Lalnienga a rawn ding chhuak dawn.
Chawhma dar 10:00 aṭangin Title Fight hi neih ṭan a ni ang a, nute champion lai Vanlalbiakdiki leh PC Lalthungheti te an inchai hmasa ang. Hemi zawh hian Lalvenhimi'n nulian kawnghren a hren lai chu F. Lalmalsawi'n chhuhsak a tum ang. Hmeichhe inelna zawh hian mipa pate, palaihawl leh palian inchaiin a zui dawn a ni.
Mizoram Wrestling Asso-cia--tion hnuaiah Mizo Palian in--chaiah hian mi pakua an champion tawh - Lalkulha chu champion hmasa ber niin a hnuah hian Tlangsiama, Lal-chungnunga, Vanlalduata, Saidingliana, Dominic Lalremsiama, LR Bawlliana, Lalhmingmawia, Lalnufela leh Lalsangliana te hi an ni. Duata hian hneh loh tawng loin inchai a chawlhsan a, tuna champion lai Sangliana hian inchai vanga lar Duata tluk a tum dawn a ni.
MWA president Ngurthan-mawia chuan, "Pi leh pu te aṭang tawhin Mizote hi mi chak ngaisang hnam kan ni a, khawtuala mi chak chuan mite hriat an hlawh ṭhin. Tun thlengin he kan rilru hi kan la kalsan lo a, Mizo mipuiten kan hnam infiamna kan neih hi kan hriata kan chhawm nun zel theih nana he inelna hi buatsaih ṭhin a ni," tiin Vanglaini palai a hrilh.
An incho
Champion kawnghren hreng-tu Sangliana hi a hna-thawhna Mizoram excise department chuan a champion nawn ngei theih nan coach leh manager an rawih sak a, training a nei ṭha tawk. Amah chotu Nienga pawh hi SAI, Mission Venga training nei reng ṭhin a nih avangin a ṭha ber ni thei turin a inbuatsaih ve bawk.
Upper Republic Veng tlangval Sangliana chuan, "Midang ka hneh tawh ang khan Nienga hi ka hneh leh dawn a, round 10 kan inbeih chhung hian ka bawhbet a nih loh pawhin ka chawi kang ang," tiin a champion kawnghren hloh an tum lo hle.
State level-ah gold 14 zet la tawh Sanglina hian thahrui a nghah a, kum 2014 khan Lal-nunfela lakah kan hmu tawh. Tun ṭumah pawh hian a dinhmun humhim tura inrin-tawkna a nei hi a mak lo.
Sangliana chawtu Lalnienga a zam bik lo, "Round 10-ah vawi 8 tal bawhbelh ka tum, ka theih tawpin ka bei ang. Kei aia naupang a nih vangin ka hlau lo a, sek hle mah se ka lakah chuan a bet sek dawn a ni mai," tiin a vawi khat nan champion a tum ruh hle.
Saitual tlangval Nienga hian palain title fight hi vawi hnih a lo hmachhawn tawh a, Bawlliana nen an inhmachhawn ṭumin a hnar thi vangin a khel chhunzawm thei lo. Kolasib tlangval Lalhmingmawia a hneh lohna pawh point khat chiah a ni - heng pahnihah hian a vanneih ni chu nise champion thei a ni.
Palaihawl
Palaihawl champion lai Zodinsanga chu tun ṭumah hian a kawng na vangin a inlan thei dawn lo. Champion kawnghren kawltu a dam loh vangin Lalmalsawma leh R. Lalrinawma te inbei tur hi chu title fight ni loin palaihawl champion zawnna a ni ang.
Kolasib tlangval Lalmal-sawma hian state level-ah gold panga, silver pasrih leh bronze pakhat a la tawh a, a khingpui tur East Lungdar chhunvawr Lalrinawma hian state level-ah gold 15, silver pali leh bronze medal pakhat a la tawh bawk - an sulhnu enin an ṭha tawk tih a chiang.
Pate
Kum 2014 pate title fight-ah Lalchhanhima'n champion lai Lalawmpuia hnehin champion kawnghren a hreng a, kuminah Thenzawl tlangval hian a kawnghren chhuhsaktu Saitual Chawnpui Veng tlangval Chhanhima lak aṭangin lak sak let ve a tum ve leh thung dawn a ni.
Lalawmpuia hian national champhioship-ah silver pahnih bakah state level-ah gold 25 zet a la tawh a, a khingpui tur Lalchhanhima hian state level-ah goal 24 a la tawh thung. 39 Assam Rifle ṭanglai Chhanhima hian kum 2007 khan minute khat chhungin push up vawi 95 tiin Mizoram record a lo siam tawh a, inhlau lo leh record intluk tawk tak an nih avangin an inchai hi a hmuhnawm lo thei lo a ni.
Entu tam?
Mizo inchai ngainatuten Lammual an pan dawn a, mah-ni veng/khua tlangval ṭawi-awm tura penchhuah hi Mizo kalphung pakhat a nih bawk avangin vawiin inchai en hi an tam tura beisei a ni.
Bihchianna
Palian Champion lai Chotu
Lalsangliana Lalnienga
Kum 25 30
San zawng 6ft 1in 6ft 2in
Rih zawng 107.7 kg 111.6 kg
Nghawng 19' 17'
Awmbawr 48.4' 46.5
Malpui 28' 30'
Palaihawl Lalmalsawma R. Lalrinmawia
Kum 23 24
San zawng 5ft 7in 5ft 8in
Rih zawng 74.10 kg 74.9 kg
Awmbawr 41.1' 44'
Malpui 25' 24.5'
Pate Champion lai Chotu
Lalchhanhima Lalawmpuia
Kum 26 23
San zawng 5ft 7in 5ft 4in
Rih zawng 60 kg 58.1 kg
Awmbawr 40' 39.5'
Malpui 21' 20'