Basti-a'n America a hnaih

Manchester United midfielder Bastian Schweinsteiger leh MLS club Chicago Fire an inhmu a, German midfielder hian January thlaah Old Trafford a chhuahsan dawn niin a lang.

Basti hi United-in amah duhtu dawr an phalsak a, Germany captain hlui hian MLS club zawm a hreh lo nia hriat a ni bawk

Jose Mourinho-a'n United a zawmtirh khan kum 32-a upa Schweinsteiger hi first team zingah a training ve a phalsak lo a, amah a training a neih loh ṭum pawh-in under 23 zingah training a nei ṭhin.

November thlatir lam khan Schwein-steiger hian first team training a zawm leh a, Mourinho-a'n German midfielder hi a mamawh vang ni loin United-in hralh-chhuah an duh avangin club dang awh theih turin an pho chhuak nia ngaih a ni.

Bayern Munich midfielder hlui Schweinsteiger hi Premier League khel turin United-in squad-ah telh mah se Europa League khel thei turin dah luh a ni lo. Manchester United tana vawi 31 inlan tawh Schweinsteiger hi Jose Mourinho-a'n a khelhtir a beiseiawm tawh lo bawk.

Schweinsteiger hian July 2015 khan pound maktaduai 14.4-in Bayern Munich aṭangin Manchester United hi a zawm a, kumin March thlaa an ṭhenawm City 1-0 a an hneh hnuah Premier League-ah a inlan tawh lo.