Aizawl FC-in Dinthar an hneh thei lo!
Mizoram Premier League champion lai Aizawl FC-in champion hmasa ber Dinthar FC an hneh hleithei lo - nimin tlai inkhel hmuhnawm takah club pahnih hi 2-2 in an inhnehtawk.
Dinthar FC-in second 46-na leka Michael Lalremruata goal hmanga hma an hruaina chu Aizawl FC-in defender Lalṭhakima leh Lalramchullova hmangin chhanglet mah se, MPL1 champion hian hun tawp dawna Cho Tshering Lepcha hmangin point an hlawh chhuak.
I League club hian point thum hmu lo mah se semifinal khel turin an inpet tling tawh. Dinthar FC erawh point thum an hmuh loh avangin semifinal lut turin Chanmari West chetsual an chan a ṭul tawh ang.
Goal rang ber
Dinthar FC forward Michael-a'n second 46-na lekah goal khung nghalin tun season-a goal rang ber a khung a, Khatla tlangval hian a club hlui lama a pet goal avangin a lawm duh lo.
Michael-a'n goal a khung theih nan hian veteran forward Samuel Laltlanthanga a thawh hlawk a, Dinthar captain shot-cross chu AFC defender Ṭhakima'n dang perin Michael hian hming ṭhat nan a hmang. Tun season-ah Michael-a'n Chanmari West captain Laldampuia goal khung zat goal sarih a khung chiah bawk.
MPL khelh meka goal khung tam ber chu Chanmari forward Malsawmfela a ni a, Ramhlun South tlangval hian goal riat a khung tawh.
AFC nge nge
Dinthar FC-in goal khung hma mah se dinhmun sawhngheh an tum lo a, chak duhna thinlung an nei lo ni berin a lang. Aizawl FC defender Ṭhakima ball tauh chu Dinthar lamin goalline aṭangin an pet chhuak hman a, amaherawhchu minute 18-naah Khawzawl tlangval Ṭhakima hian si phurh sutna goal ṭha takin a tauh lut.
Aizawl FC an chungnung hret a, Dinthar midfielder Clarence Carter-a'n inkhel a thunun theih loh avangin MPL1 champion an talbuai. I League club-in vei lam kil aṭangin Ricky Lallawmawma, Rohmingthanga leh Brandon VL Remdika te hmangin an nawr a, an phu ang ngeiin hma an hruai zui ta.
Minute 35-naah Chullova'n ṭha taka a lakluh hnuah goal-ah a pet a, defender Balogun Hammed-a'n a dan per avangin keeper Joseph Lalruatfela tan dan ngaihna a awm lo - Aizawl FC an vannei. Aizawl FC-in Rochharzela hmangin hmahruai belhchhah theihna hun an nei a, goal hmaah Chhinga Veng tlangval tawnhriat neih tam tawk loh a lang.
Dinthar an tho
Dinthar coach Lalhlupuia Sailo-in halftime a hmang ṭangkai a, second half-ah game nung zawk khelin champion lai AFC tlarhnung an nghing ngun hle.
A club hlui lakah Michael-a a hnawksak a, Lalruatpuia tlan chak vangin Aizawl FC an buai a, an defender Lalramchullova inhliam hnuah an buai lehzual. Dinthar forward Michael hian man of the match atana thlan Lalruatpuia pass ṭha tak chu goal-ah chantir thei loin net sir a pet per a, AFC defender Ṭhakima inhliam hnuah Dinthar hian goal an khung ta tho.
Minute 87-naah substitute Saihmingthanga cross chu Cho Tshering Lepcha-a'n goal-ah a chantir a, Nepali striker hian a club thar Dinthar FC tan a goal hmasa ber a khung bakah point hlu tak a hlawh chhuak bawk.
Eng nge an sawi?
Aizawl FC coach K. Malsawmkima chuan, "A mak khawp mai, Dinthar lakah hian chak kan harsat a ni. Kan defender pahnih kha inhliam lo se chuan result ṭha zawk kan nei thei tur a ni a, amaherawhchu duh ang vekin thil a thleng thei lo. Point kan hlawh chhuak a, semifinal kan luh avangin a lawmawm hrim hrim," tiin defender pahnih inhliam an tawrh thu a sawi.
Dinthar FC coach Lalhlupuia Sailo chuan, "Minute 15 hnu aṭang kha chuan kan khelṭha tawh lo a, kan game plan angin kan khel tawh lo a ni. Second half-ah erawh kan game plan-ah kan let a, kan khelh danah a lungawi thlakin ka hria. Kan tum ber kha relegate loh a ni a, kan khingpui tur Chhinga Veng leh Ramhlun North te hi team ṭha tak an nih ve tho avangin kan hmabak hi a la huphurhawm hle," tiin semifinal sawi boin tla lo tura an beih zel tur thu a sawi.
Tute nge inlan?
Aizawl FC (4-4-2) : Zothanmawia; Lalrinzuala, Lalṭhakima (Jonathan Lalhriatkima 82'), Lalramchullova (Lallawmzuala Chhakchhuak 77'), Ricky Lallawmawma; Rochharzela (Lalnuntluanga 53'), Rohmingthanga, H. Lalbiakthanga, Brandon VL Remdika; Lalremsanga, William Lalnunfela.
Dinthar FC (4-3-3) : Joseph C. Lalruatfela; Stephen Lalnunmawia, VL Chhanhima, Balogun Hammed, Zothanzuala; Clarence Carter, Cho Tshering Lepcha, Lalbiaknia; Samuel Laltlanthanga (R. Lalnunmawia 51' (Saihmingthanga 82'), Michael Lalremruata, Lalruatpuia.
Team Dinhmun
# Team Pld W D L GF GA GD Pts
1 Chanmari FC 12 6 5 1 21 11 10 23
2 Bethlehem VT 11 7 2 2 12 8 4 23
3 Aizawl FC 12 6 2 4 13 9 4 20
4 Chanmari West 12 5 2 5 15 12 3 17
5 Dinthar FC 12 2 7 3 14 18 -4 13
6 Ramhlun North 12 3 3 6 12 18 -6 12
7 Chhinga Veng 11 2 4 5 14 16 -2 10
8 Zo United 12 1 5 6 8 17 -9 8